Абноўлены парадак назначэння стыпендый і іншых грашовых выплат навучэнцам

4 студзеня, Мінск /Кар. БЕЛТА/. У Беларусі абнавілі парадак назначэння і выплаты стыпендый і іншых грашовых выплат навучэнцам. Гэтыя пытанні ўрэгуляваны пастановай Міністэрства адукацыі нумар 410 ад 31 кастрычніка 2022 года, паведамляе БЕЛТА са спасылкай на інфармацыю Нацыянальнага прававога інтэрнэт-партала.

Інструкцыяй, якая зацверджана пастановай, вызначаны ўмовы і парадак назначэння і выплаты, у прыватнасці, вучэбных стыпендый, стыпендый аспірантам, дактарантам, сацыяльных, спецыяльных, імянных стыпендый, персанальных стыпендый савета ўстановы вышэйшай адукацыі, надбавак да стыпендый за поспехі ў вучэбнай, навуковай і грамадскай дзейнасці.

Агаворваецца, што стыпендыі назначаюцца паспяваючым навучэнцам, якія вучацца за кошт сродкаў рэспубліканскага або мясцовых бюджэтаў у дзённай форме, асвойваючы змест адукацыйных праграм прафесійна-тэхнічнай, сярэдняй спецыяльнай, вышэйшай, навукова арыентаванай адукацыі. Вызначаны крытэрыі, па якіх навучэнцаў адносяць да паспяваючых.

Калі навучэнец мае права атрымліваць стыпендыю па некалькіх падставах, то яна назначаецца па той падставе, якая дае права на яе назначэнне ў найбольшым памеры.

Пры ўстанаўленні памеру вучэбных стыпендый навучэнцам, якія завяршаюць асваенне зместу адпаведных адукацыйных праграм у адпаведнасці з заканадаўствам аб адукацыі, што дзейнічала да 1 верасня 2022 года, для вызначэння кода і наймення профіляў адукацыі, напрамкаў адукацыі прымяняецца Агульнадзяржаўны класіфікатар АКРБ 011-2009 "Спецыяльнасці і кваліфікацыі", зацверджаны пастановай Мінадукацыі нумар 36 ад 2 чэрвеня 2009 года.

Пастанова ўступае ў сілу пасля яе афіцыйнага апублікавання.