"Алеі пакаленняў" да юбілею Усесаюзнага камсамола закладуць у рэгіёнах Беларусі

24 кастрычніка, Мінск /Кар. БЕЛТА/. "Алеі пакаленняў", прысвечаныя 105-годдзю Усесаюзнага камсамола, плануецца закласці ў рэгіёнах Беларусі ў час камсамольскага тыдня. Аб гэтым паведаміла карэспандэнту БЕЛТА сакратар Цэнтральнага камітэта БРСМ Вераніка Гудкова.

"Пасадка дрэў, закладка алей, сквераў і паркаў - гэта добрая традыцыя, якая захавалася з часоў камсамола. Разам з піянерамі, ветэранамі камсамольскага, маладзёжнага руху актыў Беларускага рэспубліканскага саюза моладзі і байцы Беларускіх студэнцкіх атрадаў у гэтыя дні аб'яднаюцца для добрай справы, каб высадзіць маладыя саджанцы на "Алеях пакаленняў", - расказала Вераніка Гудкова.

Паводле яе слоў, "Алеі пакаленняў" сімвалізуюць пераемнасць і дораць усім удзельнікам радасць працы і стасункаў. "Моладзі заўсёды цікава размаўляць з больш вопытнымі людзьмі, тымі, хто будаваў і захоўваў для нас, нашых дзяцей і будучых унукаў маладзёжны рух, фарміраваў экалагічную культуру", - падкрэсліла сакратар ЦК БРСМ.

Камсамольскі тыдзень у Беларусі стартаваў 21 кастрычніка з аўтапрабегу, прысвечанага 105-годдзю ВЛКСМ, які адзначаюць 29 кастрычніка. Да знакавай даты па ўсёй краіне праходзяць тэматычныя мерапрыемствы, арганізаваныя БРСМ.