Антон Смольскі заняў трэцяе месца ў спрынце на этапе Кубка свету па біятлоне

13 студзеня, Мінск /Кар. БЕЛТА/. Беларускі біятланіст Антон Смольскі заняў трэцяе месца ў спрынце на шостым этапе Кубка свету ў нямецкім Рупольдынгу, паведамляе карэспандэнт БЕЛТА.

10-кіламетровую дыстанцыю Антон Смольскі пераадолеў за 23 мін. 55,8 сек., прайграўшы пераможцу - лідару агульнага заліку французу Кентэну Фіёну Мае 32,1 сек. Другі рэзультат на фінішы паказаў прадстаўнік Германіі Бенедыкт Доль, які апярэдзіў Антона Смольскага на 24,9 сек. У адрозненне ад двух першых прызёраў, якія прайшлі абодва рубяжы на нуль, беларус прамахнуўся апошнім выстралам на стойцы і заехаў на адзін штрафны круг.

Гэты подыум стаў для Антона Смольскага другім асабістым у сезоне: раней спартсмен падымаўся на трэцюю прыступку п'едэстала па выніках спрынтарскай гонкі ў Хохфільцэне.

У нядзельную гонку праследавання кваліфікаваліся яшчэ тры беларускія біятланісты. Максім Варабей дапусціў адзін недакладны выстрал і заняў падагульняючае 28-е месца, Мікіта Лабастаў стаў 47-м (1 промах), Дзмітрый Лазоўскі - 55-м (2). Раман Ялётнаў з чатырма штрафнымі кругамі размясціўся на 88-й пазіцыі.

Этап Кубка свету па біятлоне ў Рупольдынгу прадоўжыцца дзвюма эстафетамі. Жаночая гонка адбудзецца заўтра (пачатак у 16.30 па беларускім часе), мужчынская - у суботу. На 16 студзеня запланаваны дзве гонкі праследавання.