Аўдонін: вучэнні "Захад-2021" - гэта сігнал, што Беларусь гатова абараняцца ў адказ на пагрозы

9 жніўня, Мінск /Кар. БЕЛТА/. Маштабнае сумеснае стратэгічнае вучэнне ваенных Беларусі і Расіі "Захад-2021" мае абарончы фармат і служыць інфармацыйным сігналам аб тым, што Беларусь гатова адбіць любую агрэсію і правакацыю. Такое меркаванне ў эфіры тэлеканала СТБ выказаў аналітык Беларускага інстытута стратэгічных даследаванняў Аляксей Аўдонін, паведамляе БЕЛТА.

"Вучэнні - гэта той фармат, які дае магчымасць забяспечыць павышэнне ўзроўню падрыхтоўкі нашых Узброеных Сіл і асобных падраздзяленняў. Падрыхтоўкі не толькі для адбіцця той ці іншай пагрозы, рэагавання на розныя сітуацыі, але і пытанні, звязаныя з узаемадзеяннем з падраздзяленнямі ў рамках Саюзнай дзяржавы - з Расійскай Федэрацыяй. Ва ўмовах, калі ў нашым Усходне-Еўрапейскім рэгіёне штучна нагнятаецца сітуацыя - і ў інфармацыйным фармаце, і ў палітычным, ваенным, - правядзенне вучэнняў мае некалькі мэт", - сказаў Аляксей Аўдонін.

Паводле яго слоў, акрамя асноўнай мэты вучэнні служаць своеасаблівым "інфармацыйным сігналам для нашых апанентаў аб тым, што мы гатовы да адбіцця любой агрэсіі, любой правакацыі на тэрыторыі Беларусі і не дапусцім таго, каб у нашым рэгіёне ўзнікла новая гарачая кропка".

"Мы дакладна бачым, што на граніцах Саюзнай дзяржавы вядзецца вельмі інтэнсіўная падрыхтоўка краін НАТА да правядзення нейкай (мы цяпер не можам дакладна сказаць) аперацыі. І аб гэтым сведчыць падрыхтоўка рознай інфраструктуры", - дадаў Аляксей Аўдонін. Для падмацоўвання сваіх слоў ён заявіў, што вялікія сродкі інвесціруюцца ў стварэнне баз захоўвання, тылавога забеспячэння і перагрузкі, будаўніцтва дарог і камунікацый, аэрадромаў. Гэта значыць усяго таго, што неабходна для перакідкі кантынгенту НАТА на тэрыторыю суседніх з Беларуссю краін. Прычым расходы блока на інфраструктуру, папаўненне ўзбраення, паводле слоў палітолага, растуць з 2015 года.

"Мы не можам глядзець на гэта спакойна і павінны адэкватна рэагаваць. І вядома, фармат вучэнняў абарончы, не наступальны", - падкрэсліў Аляксей Аўдонін.