Беларусь і Расія падпісалі пагадненне для паскарэння распрацоўкі стандартаў у прамысловай сферы

3 жніўня, Мінск /Кар. БЕЛТА/. У Нацыянальным агенцтве інвестыцый і прыватызацыі 1 жніўня прайшла цырымонія падпісання пагаднення паміж Беларуссю і Расіяй для паскарэння распрацоўкі стандартаў у прамысловай сферы, паведамілі БЕЛТА ў прэс-службе НАІП.

Беларускі бок прадставіў дырэктар агенцтва Дзмітрый Красоўскі, расійскі - выканаўчы дырэктар Асацыяцыі індустрыяльных паркаў Дзяніс Жураўскі. "Пагадненне паскорыць працэс распрацоўкі галіновых стандартаў і праектаў нарматыўных прававых актаў Рэспублікі Беларусь у сферы прамысловай інфраструктуры, а таксама пашырыць супрацоўніцтва расійскіх і беларускіх арганізацый для фарміравання новых інвестыцыйных праектаў", - расказалі ў прэс-службе.

Бакі таксама плануюць правесці сумесныя дзелавыя мерапрыемствы для развіцця навукова-тэхнічнага, інавацыйнага і прамысловага патэнцыялу. Гэта дасць магчымасць арганізацыям-партнёрам абмяняцца перадавым вопытам у стварэнні і развіцці індустрыяльных паркаў і ўмацаваць міжнародныя сувязі ў сферы прамысловай інфраструктуры.