БСЖ павіншаваў са святамі пажылых людзей у Смалявіцкім цэнтры сацабслугоўвання

10 студзеня, Смалявіцкі раён /Кар. БЕЛТА/. Прадстаўнікі Беларускага саюза жанчын з рэспубліканскіх СМІ прынялі ўдзел у акцыі "Ад усёй душы" і наведалі Смалявіцкі тэрытарыяльны цэнтр сацыяльнага абслугоўвання насельніцтва ў вёсцы Жажэлка, перадае карэспандэнт БЕЛТА.

Сустрэча з пажылымі людзьмі, якія наведваюць цэнтр, прайшла ў нефармальнай дружалюбнай абстаноўцы. Жанчыны з БСЖ за кубкам гарбаты паразмаўлялі з пенсіянерамі, даведаліся, чым яны цікавяцца і як праводзяць вольны час. Як аказалася, многія пажылыя людзі, нягледзячы на значны ўзрост, вядуць актыўны лад жыцця. Яны прымаюць удзел у выставах народнай творчасці, а таксама дапамагаюць іншым людзям, якія апынуліся ў няпростай жыццёвай сітуацыі. Але, што самае галоўнае, не страчваюць бадзёрасці духу і захоўваюць пазітыўны настрой.

Акрамя чаяпіцця для жыльцоў была падрыхтавана і забаўляльная праграма. Таленавітыя дзеці са Смалявіцкага раёна выступілі з музычнымі і танцавальнымі нумарамі, за якімі прадстаўнікі старэйшага пакалення назіралі з непадробным захапленнем. Свае музычныя кампазіцыі прадставілі і дарослыя артысты. Пазней пенсіянеры і самі сталі ім падпяваць. Запамінальным заключэннем праграмы стала імправізаваная дыскатэка, у якой прынялі ўдзел усе без выключэння пажылыя людзі. Зразумела, не абышлося без падарункаў - фруктаў і цёплых пледаў, так неабходных зімой.

Соф'я Андрэеўна расказала, што ў свабодны час пастаянна прымае ўдзел у розных выставах. "У мяне ёсць дачны ўчастак, дзе я вырошчваю агародніну, садавіну і ягады. Пазней я прадстаўляю іх на выстаўках агароднікаў. У цэнтры сацабслугоўвання я займаюся валанцёрскай работай. Мы дапамагаем маючым у гэтым патрэбу пенсіянерам. Я таксама займаюся з інвалідамі, дапамагаю ім вучыцца чытаць і пісаць", - расказала жанчына.

Гэта мерапрыемства прыйшлося ёй даспадобы. "Мне ўсё вельмі спадабалася. Я заўсёды адчуваю сябе маладой, стараюся захоўваць бадзёрасць духу. І сёння ў мяне таксама была магчымасць вярнуцца ў часы маёй маладосці", - з усмешкай заўважыла Соф'я Андрэеўна.

"Проста радуецца душа, больш бы такіх мерапрыемстваў. Больш за ўсё мне спадабалася дыскатэка, і артысты былі цудоўныя, - падзялілася эмоцыямі Тамара Андрэеўна. - У свабодны час мы з мужам служым у мясцовым храме, і нам гэта вельмі падабаецца. А яшчэ я лічу сябе валанцёрам. Мы дапамагаем убіраць снег, займаемся ўпрыгожваннем вуліц. Акрамя таго, аказваем дапамогу адзінокім пенсіянерам і інвалідам. Часам ім неабходна нават простая гутарка".

Як адзначыла старшыня БСЖ Вольга Шпілеўская, сённяшняя праграма была зроблена ад душы: "Я спадзяюся, вам спадабалася і вы адчулі, што рабілі мы гэта ад усёй душы. Нам трэба часцей сустракацца, часцей усміхацца адзін аднаму. У рэшце рэшт проста часцей сустракацца, таму што, як мне здаецца, гэта самае цудоўнае".

У Смалявіцкім тэрытарыяльным цэнтры сацыяльнага абслугоўвання насельніцтва ёсць аддзяленні як для кругласутачнага, так і для часовага знаходжання. Перыяд пражывання залежыць ад жадання чалавека: у цэнтры можна знаходзіцца адзін месяц, а можна і паўгода. На сённяшні дзень на пастаяннай аснове ва ўстанове пражываюць 24 чалавекі. "У нас ёсць і дзённае аддзяленне. Людзі, якія яго наведваюць, праводзяць канцэрты для пастаянных жыльцоў, размаўляюць з імі. Для пастаяльцаў арганізоўваецца самы розны адпачынак", - расказала дырэктар Смалявіцкага тэрытарыяльнага цэнтра сацыяльнага абслугоўвання Вольга Вашкоўская.