ДАІ: з 25 жніўня па 5 верасня вадзіцелі павінны будуць ездзіць з уключаным блізкім святлом фар

23 жніўня, Мінск /Кар. БЕЛТА/. З 25 жніўня па 5 верасня МУС правядзе спецыяльнае комплекснае мерапрыемства "Увага - дзеці!", у час якога вадзіцелі павінны будуць ездзіць з уключаным блізкім святлом фар, паведаміла журналістам старшы інспектар па асаблівых даручэннях галоўнага ўпраўлення дзяржаўнай аўтамабільнай інспекцыі МУС Беларусі Ганна Банадык.

"Пачынаючы з чэрвеня тэрытарыяльнымі падраздзяленнямі Дзяржаўтаінспекцыі былі абследаваны ўсе дарогі і вуліцы, прылеглыя да дашкольных навучальных устаноў, да ўстаноў сярэдняй агульнай адукацыі, а таксама да месцаў збору дзяцей: дзіцячых паліклініках, адукацыйна-творчых цэнтраў, музычных школ. Мы абследавалі стан праезнай часткі і тратуараў, наяўнасць пешаходных дарожак і неабходных тэхнічных сродкаў арганізацыі дарожнага руху, сродкаў прымусовага зніжэння скорасці руху і асвятлення", - расказала Ганна Банадык.

Паводле яе слоў, было выяўлена больш за 5 тыс. недахопаў, большая частка з якіх аператыўна ўстараняецца шляхам абнаўлення неабходных дарожных знакаў і нанясеннем разметкі. Акрамя таго, устаноўлена патрэбнасць дадатковых штучных няроўнасцей паблізу 130 абследаваных аб'ектаў, тратуараў паблізу 249 аб'ектаў, асвятлення паблізу 223, пешаходных агароджаў паблізу 31 аб'екта. Балансатрымальнікам выдадзена 333 прадпісанні на ўстараненне выяўленых недахопаў, справіцца з якімі плануюць да 1 верасня.

"Мы пачалі ўжо кантрольныя праверкі па выкананні гэтых прадпісанняў, а таксама накіравалі больш за 130 інфармацыйных пісем у мясцовыя выканаўчыя і распарадчыя органы па пытаннях стварэння бяспечных умоў паблізу месцаў прыцягнення дзяцей, у прыватнасці размова ідзе аб зонах пасадкі і высадкі дзяцей. Мы плануем, што на маршрутах дзяцей дом-школа-дом будуць створаны найбольш бяспечныя ўмовы", - дадала Ганна Банадык.

Акрамя таго, Дзяржаўтаінспекцыяй быў вывучаны стан больш як 1,5 тыс. школьных аўтобусаў. У ходзе вывучэння ўстаноўлена, што 160 з іх маюць невялікія недахопы, але пры гэтым не выяўлена фактаў эксплуатацыі школьных аўтобусаў без дазволу на допуск да ўдзелу ў дарожным руху. На гэты час дзяцей перавозяць 1508 вадзіцеляў. Штоквартальна супрацоўнікі ДАІ праводзяць з вадзіцелямі інструктажы па пытаннях бяспечнай перавозкі дзяцей, а таксама вывучаюць пытанні адпаведнасці вадзіцеля гэтым патрабаванням.

Ганна Банадык адзначыла, што яшчэ ў мінулым годзе была пачата праграма па распрацоўцы модуляў і тэставых заданняў для вучняў 2-5 класаў па вывучэнні ПДР, у прыватнасці з упорам на вывучэнне правіл бяспекі для асоб, якія перамяшчаюцца на сродках персанальнай мабільнасці і на веласіпедах.