Доўнар: сем'і загінулых воінаў-інтэрнацыяналістаў ведаюць цану міру, як ніхто іншы

15 лютага, Мінск /Кар. БЕЛТА/. З мінуты на мінуту ля мемарыяла "Востраў Мужнасці і Смутку" пачнецца мітынг, прымеркаваны Дню памяці воінаў-інтэрнацыяналістаў. Аб эмоцыях гэтага дня карэспандэнт БЕЛТА даведалася ва ўдавы загінулага афганца і старшыні рэспубліканскай асацыяцыі членаў сем'яў ваеннаслужачых, якія загінулі ў Афганістане, "Памяць і Абавязак" Тамары Доўнар.

"Сёння ў нас Дзень памяці воінаў-інтэрнацыяналістаў, таму мы ўспамінаем падзеі, якія адбыліся ў 1980-я гады. Гэтыя падзеі і гераічныя, і трагічныя, таму і дзень памяці для нас такі ж", - сказала Тамара Доўнар.

Яна адзначыла, што ўдовы і маці загінулых афганцаў многа думаюць аб тым, што здарылася, у тым ліку аб падзеях сённяшняга дня ў нашым неспакойным свеце. "Сем'і загінулых, як ніхто іншы, ведаюць цану міру. Мы молімся за захаванне міру на зямлі, таму што чакаць блізкіх з вайны, а потым хаваць іх - вельмі цяжка", - дадала яна.

Ля мемарыяла сёння і маці, якія пахавалі адзіных сыноў. "Да гэтага дня яны рыдаюць на магілах сваіх дзяцей. Ёсць тут і афіцэрскія жонкі, цяпер удовы, якія выгадавалі дзяцей і захавалі вернасць памяці мужоў. Тут прысутнічаюць дзеці, якім было суджана вырасці без бацькі, без надзейнай апоры. Мы ўдзячны, што ў гэты дзень збіраюцца дзяржаўныя ўстановы, грамадскія арганізацыі, каб ушанаваць памяць загінулых", - рэзюмавала Тамара Доўнар.