Галоўчанка адкрыў рэканструяваны ўчастак аўтадарогі Р23 ад Слуцка да Салігорска

5 лістапада, Мінск /Кар. БЕЛТА/. Прэм'ер-міністр Беларусі Раман Галоўчанка адкрыў рэканструяваны ўчастак аўтадарогі Р23 Мінск - Мікашэвічы ад Слуцка да Салігорска, перадае карэспандэнт БЕЛТА.

"У нашай краіне стала добрай традыцыяй, што да 7 лістапада адкрываюцца прамысловыя, транспартныя, сацыяльныя аб'екты. Гэты год не стаў выключэннем: у гэтыя дні па ўсёй Беларусі адкрываюцца новыя аб'екты. Гэта сведчыць аб тым, што краіна развіваецца, выконваюцца планы па стварэнні камфортных умоў асяроддзя і інфраструктуры для бізнесу і грамадзян. Праводзіцца значная работа па рэканструкцыі асноўных магістральных дарог, якія злучаюць Мінск з абласнымі цэнтрамі. Сёння ў паўднёвай частцы Мінскай вобласці, дзе сканцэнтравана вялікая колькасць прамысловых прадпрыемстваў, адкрываецца новы ўчастак дарогі Р23. Дарожнікі крыху больш чым за год правялі рэканструкцыю 15 км дарогі, узвёўшы чатырохпалосную магістраль. У планах прадаўжаць рэканструкцыю Р23 па параметрах першай катэгорыі да Старобіна. Пачаты праектныя работы па гэтым участку", - сказаў Раман Галоўчанка.

Як паведаміў сёння журналістам міністр транспарту і камунікацый Аляксей Аўраменка, рэканструяваны ўчастак Р23 ад Слуцка да Салігорска каштаваў Br78 млн. Цяпер гэта дарога з двухпалоснай стала чатырохпалоснай і поўнасцю адпавядае параметрам першай катэгорыі.-0-