Галоўчанка: чакаем, што ў бягучым годзе аб'ём выпуску імпартазамяшчальнай прадукцыі складзе $29 млрд

15 снежня, Гомель /Кар. БЕЛТА/. Прэм'ер-міністр Раман Галоўчанка ў час рабочай паездкі ў Гомель падзяліўся планамі па выпуску імпартазамяшчальнай прадукцыі, перадае карэспандэнт БЕЛТА.

Раман Галоўчанка падкрэсліў, што імпартазамяшчэнне - адзін з асноўных напрамкаў работы, таму складана выдзеліць нейкі адзін вытворчы праект. "Мы чакаем, што ў бягучым годзе аб'ём выпуску імпартазамяшчальнай прадукцыі складзе каля $29 млрд. Яшчэ два гады таму было каля $26-27 млрд, г.зн. за год мы прыбавім $2 млрд. У наступным годзе мы павінны выйсці за $30 млрд", - адзначыў ён.

Прэм'ер-міністр адзначыў, што імпартазамяшчэнне рэалізуецца па розных напрамках. За гэтым стаіць сур'ёзная работа на розных узроўнях. "Напрыклад, задача па імпартазамяшчэнні на "Гомсельмашы" была вельмі складаная, таму што выкарыстоўвалася вельмі шмат заходніх вузлоў. І пасля вядомых падзей праведзена сур'ёзная работа: неабходна было пераробліваць усю дакументацыю, правесці перагаворы з іншымі пастаўшчыкамі, паколькі няма поўных аналагаў. І такую работу правялі інжынеры, канструктары на ўсіх нашых прадпрыемствах. І цяпер мы бачым, што на ЗЛіНе, напрыклад, засталося ўсяго 4 працэнты імпартнай прадукцыі. Вельмі вялікі куст беларускіх прадпрыемстваў быў уключаны ў рэалізацыю імпартазамяшчальных праграм для нашых вядомых флагманаў", - растлумачыў прэм'ер-міністр.

Раман Галоўчанка адзначыў, што вялікая наменклатура імпартазамяшчальнай прадукцыі асвойваецца прадпрыемствамі і Гомельскай вобласці, і ўсёй рэспублікі. "Гэта тое, што нам заўсёды было неабходна, але не хапала такога штуршку (якім стала ўвядзенне санкцый. - Заўвага БЕЛТА), каб гэтым займацца. Заняліся па прычыне абставін, і гэта дае свае вынікі. Такія працэсы запушчаны па ўсіх напрамках: пачынаючы ад мэблі і заканчваючы самымі простымі вырабамі. Вядома, простыя яны толькі на першы погляд, паколькі раней усё гэта завозілася па імпарце, што, па-першае, адмоўна ўплывала на наш плацежны баланс, а па-другое, фактычна мы аддавалі грошы іншым краінам. Цяпер гэтыя сродкі застаюцца тут, з іх плацяць падаткі тут", - растлумачыў ён.

Адказваючы на пытанне аб перспектывах адкрыцця новых імпартазамяшчальных вытворчасцей, Раман Галоўчанка падкрэсліў, што складана пералічыць асобныя з іх. "Таму што $29-30 млрд - даволі вялікая доля ў агульным аб'ёме нашай вытворчасці", - рэзюмаваў ён.

Прэм'ер-міністр Раман Галоўчанка з рабочай паездкай наведаў сёння Гомельскую вобласць. Ён азнаёміўся з імпартазамяшчальнымі вытворчасцямі ў абласным цэнтры. Размова пра такія прадпрыемствы, як "Алкапак", Гомельскі філіял Беларускага пратэзна-артапедычнага аднаўленчага цэнтра, а таксама Гомельскі завод ліцця і нармалей