Галоўчанка: сістэма адукацыі працуе эфектыўна, але ёсць і недахопы, якія патрабуюць устаранення

23 жніўня, Мінск /Кар. БЕЛТА/. Сістэма адукацыі працуе эфектыўна, але ёсць і недахопы, якія патрабуюць устаранення. Аб гэтым заявіў прэм'ер-міністр Раман Галоўчанка на нарадзе па падрыхтоўцы да новага навучальнага года, перадае карэспандэнт БЕЛТА.

"Адукацыя - гэта важнейшы сацыяльны інстытут. Яе развіццё ў многім вызначае развіццё грамадства. На фінансаванне галіны ў бягучым годзе накіроўваецца звыш Br10 млрд сродкаў кансалідаванага бюджэту. Да новага навучальнага года будзе ўведзена ў эксплуатацыю дзве новыя школы, чатыры дзіцячыя сады (усяго да канца года 9 дзіцячых садоў)", - сказаў Раман Галоўчанка.

Паводле яго слоў, нацыянальная сістэма адукацыі ў цэлым функцыянуе даволі эфектыўна. Разам з тым у яе рабоце ёсць шэраг недахопаў і праблем. "Яны выяўляюцца і органамі кіравання адукацыі, і кантралюючымі органамі. У выніку кіраўніком дзяржавы на нарадзе ў мінулую пятніцу адзначана непрымальнасць нават асобных недаглядаў у гэтай сферы", - падкрэсліў прэм'ер-міністр.

Раман Галоўчанка адзначыў, што летні канікулярны перыяд - гэта традыцыйны час падрыхтоўкі ўстаноў адукацыі, падрыхтоўкі інфраструктуры да новага навучальнага года, прыняцце ўсіх неабходных мер для стварэння бяспекі і камфортных умоў для вучняў. "Разам з тым на сёння некаторая колькасць устаноў адукацыі яшчэ не завяршылі падрыхтоўку да навучальнага года (за што нясуць адказнасць іх кіраўнікі) і не маюць сертыфікатаў гатоўнасці. Паводле запэўненняў кіраўніцтва аблвыканкамаў, гэтыя сертыфікаты будуць выдадзены да пачатку навучальнага года", - паведаміў ён.

"Сёння не будзем спыняцца на той рабоце, якая праведзена ўжо. Разгледзім праблемныя пытанні, якія застаюцца, меры і шляхі іх вырашэння. Сярод праблемных пытанняў на нарадзе ў кіраўніка дзяржавы абазначана арганізацыя харчавання школьнікаў. У ходзе пілотнага праекта выпрацаваны падыходы па ўдасканаленні гэтай работы, падрыхтавана пастанова ўрада. Далажыце, як ідзе ўкараненне, ці ўлічаны ўсе пытанні, якія ўзнімаліся ў ходзе правядзення пілотнага праекта, якая ацэнка дадзена бацькамі і самімі вучнямі", - сказаў прэм'ер-міністр.

Ён адзначыў, што Прэзідэнтам краіны пастаўлена строгая задача правесці дэталёвы разбор з выпрацоўкай аператыўнага плана дзеянняў па ўстараненні ўсіх бягучых недахопаў да пачатку навучальнага года. Такім чынам на сённяшняй нарадзе будуць абмеркаваны наступныя блокі пытанняў: гатоўнасць устаноў адукацыі, пашпарты гатоўнасці, санітарна-тэхнічны стан, бяспека знаходжання вучняў, кантроль доступу, пажарная і дарожная бяспека. Акрамя таго, будуць разгледжаны пытанні арганізацыі харчавання вучняў, арганізацыі падвозу і размеркавання па школах, матэрыяльнае забеспячэнне дзяцей-сірот і іншых катэгорый маючых патрэбу, работа па паляпшэнні якасці вучэбных дапаможнікаў.-0-

Фота Паўла Арлоўскага