"Голас беларускіх жанчын выразна чуваць". Качанава пра БСЖ

3 сакавіка, Мінск /Кар. БЕЛТА/. Беларускі саюз жанчын - магутная арганізацыя, якая працуе ў нашай краіне, заявіла журналістам старшыня Савета Рэспублікі Наталля Качанава на VIII Рэспубліканскай справаздачна-выбарнай канферэнцыі Беларускага саюза жанчын, перадае карэспандэнт БЕЛТА.

"Сёння сапраўды важны дзень у жыцці нашай грамадскай арганізацыі - Беларускага саюза жанчын. Будуць выбраны новыя члены праўлення. І я вельмі спадзяюся на тое, што тыя добрыя слаўныя традыцыі, якія былі на працягу ўсіх гэтых 30 гадоў, будуць прымнажацца, развівацца дзякуючы тым, хто стаяў ля вытокаў станаўлення нашай грамадскай арганізацыі", - адзначыла спікер.

Наталля Качанава расказала, што ў жаночай арганізацыі даволі даўно. "Яшчэ тады, калі працавала ў сябе на (малой. - Заўвага БЕЛТА) радзіме, я ўступіла ў гэту грамадскую арганізацыю. Рада таму і ганаруся тым, што я ў радах Беларускага саюза жанчын", - падкрэсліла старшыня Савета Рэспублікі.

Спікер упэўнена: голас беларускіх жанчын чуваць. "Інакш проста не можа быць. Вы бачыце, што гэта не проста 150 тыс. жанчын актыўных, якія сваёй жыццёвай пазіцыяй паказваюць адносіны да краіны, людзей, народа, да тых праблем, якія ёсць, дапамагаюць іх вырашаць. Але гэта сапраўды магутная арганізацыя, якая працуе ў нашай краіне. І не проста ў цэлым у краіне, на кожным прадпрыемстве практычна, у кожным рэгіёне нашай краіны прадстаўлена наша грамадская арганізацыя - Беларускі саюз жанчын. І гэта дарагога варта, - дапоўніла Наталля Качанава. - Нашы рады прымнажаюцца, з'яўляюцца новыя пярвічныя арганізацыі БСЖ на прадпрыемствах і ў арганізацыях. Вядома, гэта цудоўна. І, вы ведаеце, тут няма абсалютна ніякага адміністрацыйнага рэсурсу. У гэтым можна не сумнявацца ніколькі. Тут ёсць толькі жаданне жанчын быць разам, працаваць на карысць нашай краіны і народа".

Сёння ў Мінску праходзіць VIII Рэспубліканская справаздачна-выбарная канферэнцыя Беларускага саюза жанчын, на якой будуць падведзены вынікі работы арганізацыі і вызначаны асноўныя напрамкі яе далейшага развіцця. У ходзе канферэнцыі будуць разгледжаны змяненні ў статут БСЖ, адбудуцца выбары кіруючага і кантрольнага органаў.

Грамадскае аб'яднанне "Беларускі саюз жанчын" з'яўляецца самай шматлікай жаночай арганізацыяй краіны. Галоўнымі напрамкамі дзейнасці саюза з'яўляюцца: стварэнне ўмоў для актыўнага ўдзелу жанчын у грамадска-палітычным, культурным і дзелавым жыцці краіны; падтрымка мацярынства і дзяцінства, традыцыйных сямейных каштоўнасцей; грамадзянска-патрыятычнае выхаванне дзяцей і моладзі; падтрымка людзей старэйшага ўзросту, ветэранаў, інвалідаў; аказанне адраснай дабрачыннай дапамогі.

Сёння Беларускі саюз жанчын - гэта парламентарыі, кіраўнікі органаў дзяржкіравання, арганізацый і прадпрыемстваў, урачы і педагогі, рабочыя і служачыя, хлебаробы і бізнесмены - паспяховыя, прафесійна запатрабаваныя і самадастатковыя жанчыны, актыўныя і ініцыятыўныя, гатовыя быць карыснымі грамадству і дзяржаве.