Качанава пра акцыю "Нашы дзеці": мы з нецярплівасцю чакаем яе, каб убачыць ззяючыя вочы дзяцей

20 снежня, Мінскі раён /Кар. БЕЛТА/. Старшыня Савета Рэспублікі Наталля Качанава прыняла ўдзел у навагодняй дабрачыннай акцыі "Нашы дзеці" і павіншавала з надыходзячымі святамі выхаванцаў Ждановіцкай спецыяльнай школы-інтэрната, перадае карэспандэнт БЕЛТА.

Наталля Качанава таксама азнаёмілася з працэсам навучання ў школе-інтэрнаце, дзе пераважна займаюцца дзеці з рознымі парушэннямі слыху. Акрамя таго, у школе працуюць і педагогі з парушэннямі слыху. "У дзяцей ёсць добры прыклад. Можна вучыцца, працаваць і быць абсалютна запатрабаванымі ў жыцці", - сказала Наталля Качанава.

Спікеру прадставілі выстаўку работ, выкананых дзецьмі. Сярод іх карціны алеем, а таксама рукадзельныя работы: пашытыя дзецьмі падушкі, сурвэткі, цацкі. Наталля Качанава адзначыла, што работы выкананы на вельмі высокім узроўні, і дадала, што дзецям неабходна развіваць свае таленты.

Святочны канцэрт, падрыхтаваны дзецьмі і педагогамі Ждановіцкай спецыяльнай школы-інтэрната, прайшоў у актавай зале. Гасцей чакаў навагодні паказ з абавязковымі персанажамі навагодніх свят - Дзедам Марозам і Снягурачкай, а таксама іншымі казачнымі героямі. Пасля канцэрта школе-інтэрнату ўручылі сертыфікат на паляпшэнне матэрыяльна-тэхнічнай базы.

У размове з журналістамі Наталля Качанава расказала, што ў час такіх сустрэч з дзецьмі міжвольна ўспамінаецца дзяцінства і святы, якія тады адзначаліся. "Усё нязменна. Мы ўсе радуемся гэтым святам, з нецярплівасцю іх чакаем. І, вядома, заўсёды рады быць у асяроддзі сяброў. А сёння тут сабраліся сябры, якія робяць вельмі важную і патрэбную справу", - адзначыла спікер.

Наталля Качанава таксама расказала пра акцыю "Нашы дзеці", якая па ініцыятыве Прэзідэнта праводзіцца шмат гадоў. "Мы чакаем яе з нецярплівасцю, таму што хочам убачыць ззяючыя вочы нашых дзяцей. Хоць мы сустракаемся з імі на працягу года, але ўсё роўна падспудна чакаем, што прыйдзе цуд і будзе свята, і ўсё будзе выдатна", - падкрэсліла яна.

Спікер выказала ўдзячнасць педагогам, якія працуюць у такіх установах. "Хацелася б павіншаваць іх з Новым годам і падзякаваць. Праца ў іх няпростая, але яны робяць вельмі важную і патрэбную справу для нашай краіны: усяляюць упэўненасць у дзяцей, аддаюць цеплыню сваёй душы і сэрца, каб дзеці адчувалі любоў, з якой да іх адносяцца ў нашай краіне", - рэзюмавала Наталля Качанава.

Настаўнік рускай мовы і літаратуры, класны кіраўнік 12-га класа Таццяна Ганісеўская працуе ў Ждановіцкай спецыяльнай школе-інтэрнаце больш за 30 гадоў. "Я прыйшла сюды яшчэ студэнткай пятага курса і засталася тут працаваць. У школе арганізавана спецыяльнае навучанне з выкарыстаннем нагляднага матэрыялу і мовы жэстаў. У нашай школе навучаюцца каля 70 дзетак, пераважна з парушэннямі слыху. Яны жывуць тут на працягу чвэрці. Старэйшыя дзеці ў асноўным выязджаюць на выхадныя", - расказала Таццяна Ганісеўская. Паводле яе слоў, да кожнага вучня патрэбны асаблівы падыход, таму напаўняльнасць класаў невялікая - да дзесяці чалавек. "Да дзетак патрэбны асаблівыя адносіны. Яны вельмі розныя, з рознымі дыягназамі. Ёсць не толькі парушэнні слыху, але і другасныя дыягназы, напрыклад дзеці з асаблівасцямі псіхафізічнага развіцця", - дадала яна.