Карпенка аб мерах бяспекі ў сталічнай адукацыі: у школах павінна быць дысцыпліна

27 жніўня, Мінск /Кар. БЕЛТА/. Устаноўка дадатковых сістэм бяспекі ў сталічных школах прызначана забяспечыць дысцыпліну і парадак ва ўстановах. Аб гэтым заявіў сёння міністр адукацыі Ігар Карпенка перад адкрыццём гарадскога форуму педагагічных работнікаў "Сталічная адукацыя: адзіная стратэгія будучага", які праходзіць у Мінскім гарадскім палацы культуры, перадае карэспандэнт БЕЛТА.

Удасканаленне сістэм бяспекі ў сталічных школах з гэтага навучальнага года (турнікеты, відэакамеры, дадатковая ахова) прызначаны максімальна выключыць усякую магчымасць прычынення шкоды дзецям і маёмасці ўстановы адукацыі, адзначыў міністр. "Трэба ствараць умовы, каб дзіцяці было камфортна ў школе, выключыць якое-небудзь негатыўнае ўздзеянне. Але ў аснове тое, аб чым гаварыў Прэзідэнт: у школе павінна быць дысцыпліна і парадак. І калі нехта вырашыў устанавіць свой статут у гэтай школе, значыць, яму там не месца. Трэба дакладна разумець: калі вы прыйшлі ў школу, значыць, у вас ёсць пэўныя абавязкі, вы павінны вучыцца, асвойваць веды ў адпаведнасці з праграмай. Ёсць пэўныя патрабаванні, карпаратыўная культура", - падкрэсліў Ігар Карпенка.

Ён падкрэсліў, што захоўваецца норма, па якой бацькі маюць права знаёміцца са зместам адукацыйнага працэсу. Гэта значыць трапіць у школу можна, але "ў парадку, устаноўленым установай адукацыі". Загадзя папярэдзіўшы і дамовіўшыся аб візіце. Або ў шосты школьны дзень, напрыклад.

"Сталіца, як і ўсе рэгіёны будзе рэалізоўваць агульныя задачы, якія стаяць перад сістэмай адукацыі", - дадаў Ігар Карпенка. Ён удакладніў, што гэта і пытанні якасці адукацыі, таксама з улікам міжнароднага вопыту, і распрацоўка дзяржаўнага школьнага стандарту, дзяржаўнай праграмы патрыятычнага выхавання насельніцтва (з магчымасцю бюджэтнага фінансавання экскурсій па знакавых мясцінах Беларусі - прадугледжваецца ўкараніць своеасаблівы "дзённік падарожніка"), і падрыхтоўка кадраў. Напрыклад, больш увагі будзе ўдзелена псіхолага-педагагічнай падрыхтоўцы спецыялістаў. "Сур'ёзную ўвагу ўдзелім дэвіяцыям, з якімі не кожны можа працаваць. Нас хвалююць суіцыдальныя паводзіны, булінг, тэма проціпраўнай дзейнасці, згубных залежнасцей, з якімі звычайны педагог і псіхолаг не заўсёды можа справіцца. Тут патрэбны крызісныя псіхолагі. Мы такую падрыхтоўку пачалі: такія спецыялісты будуць сканцэнтраваны ў сацыяльна-педагагічных цэнтрах", - удакладніў міністр.

Пленарнае пасяджэнне форуму праходзіць у фармаце дыялогавай пляцоўкі. Яно аб'яднала больш за тысячу ўдзельнікаў у зале, а таксама падключаных у рэжыме рэальнага часу дыстанцыйна яшчэ з пяці дыялогавых пляцовак.

У фае палаца разгарнулася выстаўка "Адрасы інавацыйнага вопыту" ў форме інтэрактыўных пляцовак і майстар-класаў. Адбылася і цырымонія ўзнагароджання педагагічных работнікаў з уручэннем узнагарод Міністэрства адукацыі, гарвыканкама, гарсавета дэпутатаў, камітэта па адукацыі Мінгарвыканкама і прафсаюзаў.-0-