Лукашэнка: мы жадаем толькі аднаго - бачыць усмешкі дзяцей і ведаць, што яны жывуць у міры і бяспецы

29 снежня, Мінск /Кар. БЕЛТА/. Мір і бяспека - элементарныя рэчы, якія проста абавязаны быць у жыцці кожнага дзіцяці. Аб гэтым Прэзідэнт Беларусі Аляксандр Лукашэнка заявіў на дабрачынным свяце ў рамках акцыі "Нашы дзеці", перадае карэспандэнт БЕЛТА.

"Мы вельмі хочам, каб усе падрыхтаваныя сюрпрызы і падарункі вам спадабаліся. Для нас гэта вельмі важна. А самі жадаем толькі аднаго - убачыць вашы ўсмешкі і ведаць, што вы жывяце ў міры і бяспецы. Калі дзіця ўсміхаецца, значыць, дзяржава існуе і грамадства здаровае. І, вядома, у нас баліць сэрца за мільёны іншых дзяцей (я вельмі хачу, каб вы гэта асабліва засвоілі) - дзяцей, якія загадваюць пад Новы год не новую цацку і нейкі гаджэт, як гэта прынята цяпер", - сказаў Аляксандр Лукашэнка.

Ён падкрэсліў, што неабходна памятаць аб тых дзецях, якія просяць аб міры і цяпле ў доме. Прэзідэнт звярнуў увагу, што гэта элементарныя рэчы, якія абавязаны быць у жыцці кожнага чалавека, асабліва дзіцяці. "Падкрэсліваю: у свеце вельмі шмат дзяцей, якія не маюць дамашняга цяпла, шмат дзяцей, якія хочуць паесці і проста спакойна жыць, каб на іх зямлі быў мір. Вось аб гэтых людзях, аб гэтых дзецях мы павінны памятаць заўсёды. Калі будзем памятаць, то гэта бяда ніколі не прыйдзе на нашу зямлю", - перакананы кіраўнік дзяржавы.

"На шчасце, у вас, маленькіх беларусаў, іншыя мары - дзіцячыя. Няхай яны заўсёды будуць такімі, і няхай гэтыя мары абавязкова здзяйсняюцца. Гэта і ёсць чараўніцтва, якога ўсе так чакаюць пад Новы год", - дадаў Аляксандр Лукашэнка.

Паводле слоў Прэзідэнта, аб гэтым і расказвае прыгожая легенда пра сімвал Беларусі - зубра. Яна і была пакладзена ў аснову сённяшняга паказу.

"Ад усяго сэрца яшчэ раз віншую ўсіх вас, маленькіх і ўжо дарослых - будучае нашай Беларусі, вашых педагогаў, выхавальнікаў, настаўнікаў, вашых бацькоў з Новым годам! Я жадаю вам выдатнага настрою, моцнага здароўя і, самае галоўнае, поспехаў у вучобе. Вучоба для вас - самая галоўная задача на гэтым этапе вашага жыцця. А цяпер з вялікім задавальненнем уступаю гэту сцэну нашым гаспадарам - Дзеду Марозу і Снягурачцы", - сказаў беларускі лідар.

У Беларусі з 15 снежня 2022 года па 15 студзеня 2023 года праходзіць навагодняя дабрачынная акцыя "Нашы дзеці". У гэты час вышэйшыя службовыя асобы краіны, кіраўнікі дзяржаўных органаў і арганізацый, канцэрнаў і банкаў, буйнейшых грамадскіх аб'яднанняў наведваюць дзіцячыя інтэрнаты, бальніцы, шматдзетныя сем'і і дзіцячыя дамы сямейнага тыпу. Неад'емная частка акцыі - абласныя навагоднія святы. На рэспубліканскім узроўні ў акцыі прымуць удзел больш за 20 тыс. дзяцей. У цэлым мерапрыемствамі будзе ахоплены амаль 1 млн дзяцей.

Галоўнай падзеяй дабрачыннага праекта стала навагодняе свята для дзяцей з удзелам Прэзідэнта і паказ "Сузор'е зубра". На галоўную ёлку краіны запрасілі больш за 2,3 тыс. дзяцей з усіх рэгіёнаў Беларусі. Гэта дзеці-сіроты і дзеці, якія засталіся без апекі бацькоў, выхаванцы кадэцкіх вучылішчаў, дзеці з сем'яў бежанцаў, дзеці з Данбаса, дзеці асоб, якія загінулі пры выкананні воінскага абавязку, навучэнцы - пераможцы міжнародных, рэспубліканскіх, рэгіянальных алімпіяд, конкурсаў, фестываляў і спаборніцтваў.

На паказ у Палац Рэспублікі таксама былі запрошаны сваякі герояў Беларусі маёра Андрэя Нічыпарчыка і лейтэнанта Мікіты Куканенкі і сям'я загінулага супрацоўніка КДБ Дзмітрыя Федасюка.