Лукашэнка прапанаваў Прэзідэнту Кеніі выпрацаваць дарожную карту развіцця супрацоўніцтва

10 снежня, Найробі /Кар. БЕЛТА/. Прэзідэнт Беларусі Аляксандр Лукашэнка на перагаворах у Кеніі з кіраўніком гэтай дзяржавы Уільямам Рута прапанаваў выпрацаваць дарожную карту развіцця супрацоўніцтва, перадае карэспандэнт БЕЛТА.

"Хачу падзякаваць Вам за сардэчнае запрашэнне прыехаць да Вас у гэты час. Час позні. Мы з вамі дамовіліся ў Дубаі, што сустрэнемся і абмяркуем нашы першыя крокі па ўстанаўленні гандлёва-эканамічных і больш цесных палітычных адносін", - сказаў у пачатку сустрэчы беларускі лідар.

Паводле яго слоў, цяпер трэба вызначыць напрамкі далейшага супрацоўніцтва і выйсці на нейкі канкрэтны план па гэтых напрамках. "Калі мы хочам супрацоўнічаць, я ўпэўнены, што мы такі план - дарожную карту - зможам выпрацаваць. Так, як мы гэта зрабілі з іншымі краінамі Афрыканскага кантынента", - заявіў Прэзідэнт Беларусі.

"Вы павінны ведаць, спадар Прэзідэнт, што калі мы дамовімся, мы пройдзем хутка гэты шлях. Таму што Ваша краіна вельмі важнае стратэгічнае становішча займае ў Афрыцы. Вы ў многім вызначаеце палітыку Афрыканскага кантынента. Пра гэта мне расказваў Прэзідэнт Экватарыяльнай Гвінеі", - адзначыў Аляксандр Лукашэнка.

З улікам таго, што на вышэйшым узроўні прынята рашэнне інтэнсіфікаваць двухбаковыя адносіны, кіраўнік дзяржавы прапанаваў групам спецыялістаў з Беларусі і Кеніі абмяняцца візітамі, блізка пазнаёміцца з краінамі, каб падрыхтаваць канкрэтны план дзеянняў па развіцці супрацоўніцтва.

Аляксандр Лукашэнка таксама запрасіў свайго кенійскага калегу зрабіць візіт у Беларусь. "Я буду рады сустрэць Вас у любы час. Думаю, у першым паўгоддзі будучага года Вы знойдзеце такі час, каб прыехаць да нас у Мінск", - сказаў ён.

У сваю чаргу Уільям Рута ад імя ўсяго народа Кеніі прывітаў Аляксандра Лукашэнку на кенійскай зямлі. "Мы вельмі рады, што Вы знайшлі час прыехаць да нас. Разумею, што візіт будзе кароткатэрміновым, але тым не менш ад гэтага не менш сардэчным з нашага боку. Гэта не афіцыйны візіт. Тым не менш гэта дае нам магчымасць запланаваць афіцыйны візіт. Зразумела ж, мы вельмі рады, што Вы знайшлі час наведаць нас і быць сёння з намі", - сказаў ён.

Кенійскі лідар нагадаў, што ў час мінулай сустрэчы на Сусветным саміце па клімаце ў Дубаі кіраўнікі дзяржаў сышліся на думцы аб неабходнасці інтэнсіфікаваць кантакты паміж Беларуссю і Кеніяй. "Мы дамовіліся, што сумесна паглядзім на нашы магчымасці і сферы, дзе мы маглі б супрацоўнічаць, і выбудоўваць адносіны ўжо на той аснове, якую мы стварылі паміж нашымі дзвюма краінамі", - адзначыў Уільям Рута.