Мінабароны паведаміла аб праверцы боегатоўнасці Узброеных Сіл Беларусі

3 красавіка, Мінск /Кар. БЕЛТА/. Сёння па даручэнні кіраўніка дзяржавы пачата праверка баявой гатоўнасці Узброеных Сіл Беларусі, паведамілі БЕЛТА ў прэс-службе Міністэрства абароны.

У прэс-службе ваеннага ведамства расказалі, што мерапрыемствы маюць комплексны характар. Яны дадуць магчымасць вызначыць здольнасць камандзіраў кіраваць падпарадкаванымі воінскімі часцямі і падраздзяленнямі пры іх прывядзенні ў вышэйшую ступень баявой гатоўнасці, а таксама гатоўнасць воінскіх часцей выконваць задачы па прызначэнні ва ўстаноўленыя тэрміны. Агульнае кіраўніцтва праверкай ускладзена на Дзяржаўны сакратарыят Савета бяспекі.

У прэс-службе Міністэрства абароны звярнулі ўвагу, што пры праверцы запланавана перамяшчэнне ваеннай тэхнікі. Акрамя таго, магчыма часовае абмежаванне руху грамадзянскага транспарту па дарогах агульнага карыстання і ўчастках мясцовасці.