Мінадукацыі: вынікі першага ЦЭ пералічаць па новай методыцы, яна распрацавана з выкарыстаннем падыходаў, што прымяняюцца пры правядзенні РТ

2 чэрвеня, Мінск /Кар. БЕЛТА/. Вынікі першага цэнтралізаванага экзамену пералічаць па новай методыцы, балы можна будзе даведацца ўжо сёння. Аб гэтым журналістам паведаміў міністр адукацыі Андрэй Іванец, перадае карэспандэнт БЕЛТА.

"Цяпер завяршыла работу міжведамасная камісія, якая правярала карэктнасць падліку вынікаў першага цэнтралізаванага экзамену. Вынікі праверкі паказалі, што памылак няма, у тым ліку і ў методыцы разліку тэставых балаў. Разам з тым па колькасці зваротаў, якія да нас паступілі ад грамадзян, стала відавочна, што методыка вельмі складаная. Таму Прэзідэнтам нашай краіны Аляксандрам Лукашэнкам дадзена канкрэтнае даручэнне - спрасціць методыку разліку і зрабіць яе зразумелай для кожнага чалавека. Міністэрствам адукацыі такая работа праведзена, у яе распрацоўцы выкарыстоўваліся падыходы, якія прымяняліся пры правядзенні рэпетыцыйнага тэсціравання. Ужо сёння будуць пералічаны вынікі першага цэнтралізаванага экзамену і сёння ж размешчаны на сайце РІКВ, а таксама ў асабістых кабінетах абітурыентаў. Вынікі другога ЦЭ таксама будуць разлічаны па гэтай жа методыцы, іх можна будзе даведацца ў панядзелак", - сказаў Андрэй Іванец.

Ён адзначыў, што разам з вынікамі цэнтралізаванага экзамену, як першага, так і другога, будуць апублікаваны табліцы пераводу першасных балаў у тэставыя, па якіх кожны абітурыент і кожны выпускнік зможа пераправерыць правільнасць і карэктнасць разліку сваіх вынікаў.

"Усім абітурыентам, якія рыхтуюцца да ўдзелу ў цэнтралізаваным тэсціраванні, трэба таксама разумець, што ўмовы правядзення і ЦЭ, і ЦТ будуць абсалютна ідэнтычныя. Гэта датычыцца як складанасці тэставых заданняў, якія цалкам адпавядаюць школьнай праграме, так і разліку тэставых балаў. Гэта вельмі важна, таму што мы павінны стварыць роўныя, зразумелыя, справядлівыя ўмовы для ўсіх выпускнікоў бягучага года, так і для выпускнікоў мінулых гадоў, якія ў гэтым годзе будуць мець магчымасць здаць тры цэнтралізаваныя тэсціраванні для паступлення ў нашы ўніверсітэты", - рэзюмаваў кіраўнік адукацыйнага ведамства.

Акрамя таго, Міністэрства адукацыі прадоўжыць прыём грамадзян, і ў выпадку ўзнікнення пытанняў будуць дадзены растлумачэнні.