Мінпрацы: рэальны рост даходаў насельніцтва застаецца ў прыярытэце на 2023 год

25 лютага, Мінск /Кар. БЕЛТА/. Рэальны рост даходаў насельніцтва застаецца ў прыярытэце на 2023 год, паведамілі БЕЛТА ў прэс-службе Міністэрства працы і сацыяльнай абароны, падводзячы вынікі галіны за 2022 год.

Нягледзячы на санкцыйныя абмежаванні, у рэспубліцы ў 2022 годзе былі прыняты меры па забеспячэнні росту заработнай платы бюджэтнікаў. Забяспечаны рост базавай стаўкі, павялічаны памеры галіновых стымулюючых выплат настаўнікам, урачам, выхавальнікам, работнікам культуры, фізкультуры і сацыяльнага абслугоўвання, у два разы павялічаны памер аднаразовай выплаты на аздараўленне.

На выплату заработнай платы работнікам бюджэтнай сферы ў 2022 годзе накіравана Br13 млрд.

У выніку зарплата работнікаў бюджэтнай сферы ў снежні склала Br1 416,3, павялічыўшыся да снежня мінулага года на 11,7 працэнта. У сярэднім за 2022 год яе памер - Br1 263,3, тэмп росту - 110,6 працэнта.

Пры гэтым у асобных катэгорый работнікаў бюджэтнай сферы заработная плата вырасла больш значна. Напрыклад, у настаўнікаў у сярэднім за 2022 год - на 20 працэнтаў, у работнікаў сферы сацыяльнага абслугоўвання і сферы культуры - на 21 працэнт. Рэальнае забеспячэнне заработнай платы гэтых катэгорый работнікаў было на ўзроўні 104-105 працэнтаў. Для падтрымання нізкааплатных работнікаў захоўваецца рэальнае забеспячэнне мінімальнай заработнай платы на ўзроўні 102,2 працэнта.

У бягучым годзе рост зарплат бюджэтнікаў будзе забяспечаны за кошт павышэння памеру базавай стаўкі. З 1 студзеня яе памер павялічыўся на 7,5 працэнта, з Br212 да Br228.

Як і ў мінулым годзе, павышэнне базавай стаўкі ў 2023 годзе будзе праходзіць у некалькі этапаў, яе сярэднегадавое значэнне павялічыцца на 10 працэнтаў. Паколькі да базавай стаўкі прывязаны іншыя стымулюючыя і кампенсуючыя выплаты, то іх памеры таксама павялічацца.

Акрамя таго, з 1 студзеня ўзраслі памеры галіновых стымулюючых выплат асобным катэгорыям работнікаў практычна па кожнай галіне сацыяльнай сферы. Гэта настаўнікі, прафесарска-выкладчыцкі склад, медыцынскія работнікі, работнікі спорту. Пры гэтым работнікам культуры і сферы сацыяльнага абслугоўвання галіновыя стымулюючыя выплаты былі павялічаны з апераджальным графікам з кастрычніка і лістапада мінулага года адпаведна. На гэтыя мэты з бюджэту будзе накіравана больш як Br900 млн, з іх Br350 млн - гэта дадатковыя расходы адносна 2022 года.

Паводле ацэнкі, заработная плата гэтых катэгорый работнікаў у 2023 годзе павялічыцца ў сярэднім на 16 працэнтаў.