Міратворчае вучэнне АДКБ пройдзе на тэрыторыі Расіі 8-12 лістапада

1 лістапада, Масква /Эдуард Півавар - БЕЛТА/. У рамках сумеснага аператыўна-стратэгічнага вучэння "Баявое братэрства" з 8 па 12 лістапада на тэрыторыі Расіі адбудзецца сумеснае міратворчае вучэнне АДКБ "Непарушнае братэрства", паведамілі БЕЛТА ў Аб'яднаным штабе АДКБ.

"На палігоне Казанскага вышэйшага танкавага каманднага ордэна Жукава Чырванасцяжнага вучылішча групоўка войскаў (калектыўных сіл) АДКБ будзе адпрацоўваць задачы па падрыхтоўцы і вядзенні міратворчай аперацыі калектыўнымі міратворчымі сіламі (КМС) АДКБ, - расказалі ў Аб'яднаным штабе. - Галоўнымі задачамі вучэння стануць удасканаленне практычных навыкаў службовых асоб органаў кіравання войскамі (калектыўнымі сіламі) АДКБ у арганізацыі дзеянняў падпарадкаваных войскаў і кіраванні імі пры выкананні задач па прызначэнні, а таксама павышэнне зладжанасці воінскіх часцей і падраздзяленняў, якія ўваходзяць у склад КМС АДКБ, у час правядзення аперацыі па падтрыманні міру".

У вучэнні плануецца ўдзел воінскіх кантынгентаў дзяржаў - членаў арганізацыі, падраздзяленняў ваеннай паліцыі, аператыўных груп Аб'яднанага штаба і Сакратарыята АДКБ, фарміраванняў органаў унутраных спраў (паліцыі), нацыянальных гвардый, а таксама ўпаўнаважаных органаў у сферы папярэджання і ліквідацыі наступстваў надзвычайных сітуацый.

"Падчас практычных дзеянняў міратворчыя сілы адпрацуюць дзеянні на блокпасце, задачы ў лагеры бежанцаў, суправаджэнне калон з гуманітарным грузам, блакіраванне населенага пункта, штурм будынка, занятага "баевікамі", а таксама вызваленне "заложнікаў" і аказанне дапамогі пацярпелым", - дадалі ў Аб'яднаным штабе АДКБ.

На заключны этап вучэнняў запрошаны прадстаўнікі Парламенцкай асамблеі АДКБ, Сербіі, Узбекістана і Манголіі, а таксама Міжнароднага камітэта Чырвонага Крыжа і іншых міжнародных арганізацый.

Міратворчыя сілы АДКБ - сукупнасць міратворчых кантынгентаў, прызначаных для ўдзелу ў міратворчых аперацыях АДКБ. Для камплектавання міратворчых сіл дзяржавы - члены арганізацыі ў адпаведнасці са сваім нацыянальным заканадаўствам выдзяляюць на пастаяннай аснове міратворчыя кантынгенты. Міратворчыя кантынгенты дзяржаў - членаў АДКБ - спецыяльна падрыхтаваны ваенны, міліцэйскі (паліцэйскі) і грамадзянскі персанал, а таксама сілы і сродкі, якія прадстаўляюцца дзяржавамі - членамі арганізацыі ў склад міратворчых сіл АДКБ. Агульная колькасць - амаль 3,6 тыс. чалавек.