Напярэдадні Новага года і Раства ДАІ ўдзеліць асаблівую ўвагу нецвярозым удзельнікам дарожнага руху

26 снежня, Мінск /Кар. БЕЛТА/. Дзяржаўтаінспекцыя праводзіць адзіны дзень бяспекі дарожнага руху пад назвай "В Новый год и в добрый путь - за рулем ты трезвым будь!". Прафілактычныя мерапрыемствы напярэдадні Новага года і Раства пройдуць па ўсёй рэспубліцы і будуць накіраваны на выяўленне і прыцягненне да адказнасці нецвярозых удзельнікаў дарожнага руху. Аб гэтым БЕЛТА паведамілі ў ГУ ДАІ МУС.

"Кіраванне транспартам у стане алкагольнага ап'янення - адно з самых сур'ёзных парушэнняў ПДР. Аўтамабіль з'яўляецца крыніцай павышанай небяспекі, а ў руках нецвярозага - зброяй, якая калечыць чалавечыя жыцці. Пасля прыёму алкаголю парушаюцца функцыі ўвагі і памяці, запавольваюцца працэсы мыслення, парушаецца каардынацыя рухаў і павялічваецца час рэакцый. У выніку вадзіцелю патрэбна больш часу для ацэнкі дарожнай абстаноўкі, прыняцця рашэння і выканання неабходных дзеянняў", - растлумачылі небяспеку п'янага ваджэння ў ДАІ.

Цяжар наступстваў дарожна-транспартных здарэнняў, учыненых грубымі парушальнікамі, значна вышэйшы ў параўнанні з астатнімі аварыямі. У аварыях з удзелам нецвярозых удзельнікаў дарожнага руху ў паўтара раза больш смяротных выпадкаў і цяжкіх траўмаў у пацярпелых.

Актуальнасць праблемы п'яных вадзіцеляў і нецвярозых пешаходаў на дарогах рэспублікі пацвярджаецца статыстыкай. "За 11 месяцаў 2023 года на тэрыторыі Мінскай вобласці вартавымі дарог затрыманы 2313 вадзіцеляў у стане ап'янення. Па віне вадзіцеляў, якія кіравалі транспартным сродкам у стане алкагольнага ап'янення, за названы перыяд адбылося 576 улічаных ДТЗ, у якіх 128 чалавек загінулі і 624 атрымалі траўмы рознай ступені цяжкасці", - расказалі ва УДАІ УУС Мінскага аблвыканкама.

У ДАІ нагадалі, што згодна з Кодэксам аб адміністрацыйных правапарушэннях Рэспублікі Беларусь, за нецвярозае кіраванне з наяўнасцю ў крыві да 0,8 праміле алкаголю ўключна на вадзіцеля накладаецца штраф у памеры 100 базавых велічынь з пазбаўленнем права займацца пэўнай дзейнасцю тэрмінам на 3 гады, больш за 0,8 праміле - 200 базавых велічынь штрафу з пазбаўленнем права займацца пэўнай дзейнасцю тэрмінам на 5 гадоў. Ужыванне вадзіцелем алкаголю пасля ўчынення ДТЗ, удзельнікам якога ён з'яўляецца, да праходжання медагляду на прадмет вызначэння стану ап'янення вядзе да накладання штрафу ў памеры 200 базавых велічынь з пазбаўленнем права займацца пэўнай дзейнасцю тэрмінам на 5 гадоў. За паўторнае ваджэнне ў стане ап'янення на працягу года правапарушальнік прыцягваецца да крымінальнай адказнасці. Пры гэтым прадугледжана спецыяльная канфіскацыя транспартнага сродку, якім кіравалі ў стане ап'янення, незалежна ад права ўласнасці.

Непасрэдную пагрозу бяспечнаму дарожнаму руху ствараюць і нецвярозыя пешаходы. Як дадалі ў ДАІ, яны паводзяць сябе нелагічна, неасцярожна, а часам і агрэсіўна. Паводзіны такой катэгорыі пешаходаў немагчыма прадугадаць: раптоўны і неабдуманы выхад на праезную частку і жаданне паляжаць на ёй заканчваюцца цяжкімі наступствамі. У адпаведнасці з арт. 18.20 ч.2 КоАП Рэспублікі Беларусь, адміністрацыйнае спагнанне ў выглядзе штрафу за знаходжанне на праезнай частцы ў нецвярозым стане ў якасці пешахода або веласіпедыста складае ад 3 да 5 базавых велічынь.