"Панікі ў рэгіёнах няма". Крутой аб сітуацыі пасля ўрагану ў раёнах Гомельскай вобласці

18 ліпеня, Калінкавіцкі раён /Кар. БЕЛТА/. На сёння панікі ў раёнах, пацярпелых пасля навальнічнага фронту, няма. На гэтым зрабіў акцэнт кіраўнік Адміністрацыі Прэзідэнта Дзмітрый Крутой у размове з журналістамі па выніках наведвання Лельчыцкага, Мазырскага і Калінкавіцкага раёнаў, перадае карэспандэнт БЕЛТА.

Па даручэнні кіраўніка дзяржавы Дзмітрый Крутой прыбыў у Гомельскую вобласць, каб ацаніць ход выканання аднаўленчых работ пасля праходжання навальнічнага фронту.

"Такога разгулу стыхіі, як у мінулую нядзелю, на Гомельскай зямлі нават старажылы не памятаюць. І фактычна адразу ж, праз гадзіну, ужо былі арганізаваны першыя штабы на ўзроўні Прэзідэнта, па лініі віцэ-прэм'ера, губернатара і профільных міністраў. Так, першыя навіны прыйшлі сумныя - аб загінулых, сярод якіх і дзеці. Гэта вялікая страта, прыносім шчырыя спачуванні родным і блізкім. Хуткага выздараўлення жадаем пацярпелым грамадзянам, многія з якіх атрымалі цяжкія траўмы, і нашы ўрачы робяць усё магчымае, каб людзі хутчэй аднавіліся", - падкрэсліў ён.

Кіраўнік Адміністрацыі Прэзідэнта таксама абазначыў аператыўную работу па ачыстцы ад бураломаў аўтадарог і чыгуначнага палатна, аднаўленні электразабеспячэння абясточаных населеных пунктаў і інш. "Так, на першым этапе складаным момантам было забеспячэнне зносін на нашых транспартных артэрыях. Таму ў першую чаргу заняліся расчысткай дарог, каб даць магчымасць праезду, у тым ліку і рамонтным брыгадам", - растлумачыў ён.

Востра стала пытанне і з энергазабеспячэннем. "Напэўна, самая складаная сітуацыя, у прыватнасці, для Гомельскай вобласці - у сферы электраэнергетыкі. 1254 населеныя пункты фактычна ў момант былі абясточаны. Гэта значыць 33 працэнты ўсіх спажыўцоў вобласці засталіся без святла фактычна ў адну хвіліну. Пацярпелі ўсе віды ліній электраперадачы. Зразумела, што ў момант запусціць усю гэту сістэму зноў было складана - спатрэбіцца пэўны час", - акцэнтаваў Дзмітрый Крутой.

Работы па аднаўленні ў раёнах прадаўжаюцца. Іх ход на асабістым кантролі кіраўніка дзяржавы.-0-