Педкалектывы, матэрыяльна-тэхнічная база, харчаванне - Петрышэнка аб гатоўнасці школ да навучальнага года

26 жніўня, Мінск /Кар. БЕЛТА/. Намеснік прэм'ер-міністра Ігар Петрышэнка расказаў сёння журналістам аб гатоўнасці ўстаноў адукацыі да новага навучальнага года, перадае карэспандэнт БЕЛТА.

"Гэтымі днямі адбылося важнае мерапрыемства - Рэспубліканскі педагагічны савет, на якім кіраўніком дзяржавы пастаўлены задачы па перазагрузцы сістэмы адукацыі. А сёння мы заслухаем інфармацыю аб поўнай гатоўнасці ўстаноў адукацыі - дашкольных, школ, прафесійна-тэхнічных, сярэдніх спецыяльных, ВНУ - да пачатку новага навучальнага года. У парадку дня гатоўнасць педкалектываў, матэрыяльна-тэхнічнай базы, забяспечанасць вучэбнымі дапаможнікамі, бяспека дзяцей, выкананне адпаведных мер санэпідрэжыму. Мы ўнеслі некаторыя карэктывы, каб дзеці і педагогі не хварэлі, але пры гэтым не парушалася цэласнасць і эфектыўнасць навучальнага працэсу", - сказаў Ігар Петрышэнка.

Ён таксама адзначыў, што дзяржава аказвае дапамогу малазабяспечаным і шматдзетным сем'ям па падрыхтоўцы да новага навучальнага года. "Таксама мы праводзім маніторынг работы школьных базараў, ці ёсць неабходны асартымент школьнай прадукцыі, якаснай і разнастайнай, даступнай па цане. Прыняты меры і для ўкамплектавання вучэбных аўдыторый, кабінетаў. Акрамя таго, важна гатоўнасць спартыўных аб'ектаў. Стадыёны павінны былі прывесці ў парадак. Фізічная падрыхтоўка - неад'емны атрыбут заняткаў у школах, ВНУ, ССНУ", - адзначыў віцэ-прэм'ер.

"Яшчэ адзін важнейшы элемент - арганізацыя харчавання. Міністэрства аховы здароўя разам з Міністэрствам адукацыі ўнеслі пэўныя карэкціроўкі. Мінск ідзе да таго, што ў школах будуць уведзены QR-коды. Гэта дасць магчымасць глядзець, што дзіцяці можна, а што нельга ўжываць у ежу. Таму мы адпрацоўваем і лічбавыя аспекты арганізацыі харчавання", - дадаў Ігар Петрышэнка.

Ён таксама звярнуў увагу, што пачне працаваць шэраг новых школ і дашкольных устаноў адукацыі.

У 2021/2022 навучальным годзе будуць функцыянаваць 2,9 тыс. устаноў, якія рэалізуюць праграмы агульнай сярэдняй адукацыі, 125 прафесійна-тэхнічных і 110 сярэдніх спецыяльных навучальных устаноў, а таксама 50 ВНУ.-0-