Петрышэнка: людзі з інваліднасцю павінны мець магчымасць для самарэалізацыі

7 снежня, Дзяржынск /Кар. БЕЛТА/. Людзі з інваліднасцю не павінны адчуваць сябе па-за грамадствам, павінны весці грамадскую работу і мець магчымасць для самарэалізацыі. Аб гэтым расказаў журналістам намеснік прэм'ер-міністра Рэспублікі Беларусь Ігар Петрышэнка, наведваючы Дзяржынскі раён, дзе праходзіць выязное пасяджэнне Рэспубліканскага міжведамаснага савета па правах інвалідаў, перадае карэспандэнт БЕЛТА.

"Сённяшняе мерапрыемства трэцяе ў гэтым годзе, а работа савета датычыцца прыкладна 6 працэнтаў насельніцтва нашай краіны, уключаючы дзяцей з асаблівасцямі псіхафізічнага развіцця. За бягучы год мы ўдасканалілі нарматыўную прававую базу, увёўшы ў Кодэкс аб адукацыі паняцце інклюзіўнай адукацыі. У сілу ўступілі тыя нормы, якія даюць магчымасць дзецям з асаблівасцямі псіхафізічнага развіцця атрымаць адукацыю дома або займацца ў групах разам з іншымі дзецьмі, што дае магчымасць больш якасна атрымліваць рэабілітацыю і ўваходзіць у асяроддзе, якое патрэбна для іх сацыялізацыі і стасункаў з равеснікамі. У ліку сур'ёзных крокаў адкрыццё чатырох цэнтраў, абласных і раённых, рэабілітацыі і абілітацыі інвалідаў. Набылі 39 транспартных сродкаў, абсталяваных для дастаўкі іх у тэрытарыяльныя цэнтры, паліклінікі, увялі такі від падтрымкі, як асістэнт, які забяспечвае суправаджэнне інвалідаў. І гэту паслугу таксама аплачвае дзяржава", - расказаў Ігар Петрышэнка.

Ён таксама адзначыў, што з 1 верасня 2023 года ўведзена адзіная рэспубліканская інфармацыйная сістэма, у якую ўнесены кожны інвалід, а таксама ўсе віды падтрымкі, якія ён атрымлівае і ў якіх мае патрэбу. Гэта дае магчымасць кіраваць працэсам у маштабах краіны.

"У полі зроку дзяржавы таксама знаходзяцца ўсе 78 прадпрыемстваў краіны, якія створаны нашымі таварыствамі інвалідаў. Мы актыўна ўзаемадзейнічаем з гэтымі арганізацыямі, а іх прадстаўнікі ўваходзяць у склад міжведамаснага савета па правах інвалідаў. Таму, па сутнасці, за апошнія тры гады на дзяржаўным узроўні праведзена маштабная дыягностыка той неабходнай дапамогі і садзейнічання ў рэабілітацыі і абілітацыі інвалідаў. Мы правялі выязныя пасяджэнні савета ў пяці рэгіёнах, сёння савет працуе ў шостым - падводзім вынікі работы ў Мінскай вобласці, застанецца толькі горад Мінск", - расказаў намеснік прэм'ер-міністра.

Выяўленыя недахопы ў рэгіёнах дадуць магчымасць не толькі скарэкціраваць работу, але і ўкараніць лепшы вопыт, які дае свой плён, паколькі галоўнай мэтай такой работы з'яўляецца не толькі сацыялізацыя інвалідаў, але і іх самарэалізацыя.

"Нашы людзі з інваліднасцю не павінны адчуваць сябе па-за грамадствам, прымаць актыўны ўдзел у грамадскім жыцці. Усе навыкі, таленты яны павінны развіваць з выкарыстаннем самых перадавых методык", - падкрэсліў ён.

У Мінскай вобласці пражывае 100 тыс. людзей з інваліднасцю, з іх 7 тыс. - гэта непаўналетнія. У рэгіёне працуе 8 цэнтраў ранняга ўмяшання, 23 цэнтры тэрытарыяльнага абслугоўвання, у 26 групах якіх праводзіцца рэабілітацыя і абілітацыя.

У ходзе выязнога пасяджэння Рэспубліканскага міжведамаснага савета па правах інвалідаў яго ўдзельнікі наведалі новы фізкультурна-аздараўленчы комплекс "Аквамарын" у Фаніпалі, азнаёміліся з матэрыяльна-тэхнічнай базай тэрытарыяльнага цэнтра сацыяльнай абароны насельніцтва Дзяржынскага раёна, дзе створаны ўмовы для рэабілітацыі і абілітацыі людзей з абмежаванымі магчымасцямі, у тым ліку дзяцей з інваліднасцю.