"Сітуацыя вельмі складаная". Кулік паставіў задачы па ўстараненні наступстваў непагоды

15 ліпеня, Мінск /Кар. БЕЛТА/. У Мінлясгасе прайшла аператыўная нарада, галоўнае пытанне - устараненне наступстваў шквалістага ветру пасля выхадных. Аб гэтым паведамілі БЕЛТА ў прэс-службе Мінлясгаса.

"Сітуацыя вельмі складаная, асабліва па Гомельскай вобласці. Паводле папярэдніх даных, агульны аб'ём суцэльнай санітарнай высечкі тут складае амаль 1100 га. Падкрэслю, гэта папярэднія даныя. Канчатковы аб'ём яшчэ трэба ўдакладніць. Трэба тэрмінова прымаць усе неабходныя меры па ліквідацыі", - паставіў задачу міністр.

Як было адзначана на нарадзе, дрэннае надвор'е нанесла значны ўрон таксама ў Гродзенскай, Мінскай і Магілёўскай абласцях. Аляксандр Кулік паставіў задачу літаральна за два-тры дні абследаваць лясны фонд і вызначыць прыкладныя аб'ёмы правядзення суцэльнай санітарнай высечкі. "Выбарачныя санітарныя высечкі, як адзначаюць асобныя генеральныя дырэктары ДВЛГА, ёсць практычна ў кожным лясгасе", - дадаў міністр.

Пасля апаратнай нарады першы намеснік міністра лясной гаспадаркі Аляксандр Драгун адправіўся ў Мазырскі доследны лясгас. Гэта адзін з найбольш пацярпелых лясгасаў. РУП "Белдзяржлес" даручана прыпыніць бягучыя віды работ і накіраваць усе сілы і рэсурсы на абследаванне пашкоджаных участкаў ляснога фонду.

Лясгасы Гомельскага ДВЛГА выдзеляць 40 брыгад леснікоў для расчысткі аўтамабільных дарог і ліній электраперадачы. Некалькі гарадоў у Гомельскай вобласці цяпер абясточаны. Работнікі лясной гаспадаркі аператыўна расчышчаюць прылеглыя да ліній электраперадачы ўчасткі. "Трымаем сітуацыю на ручным кантролі", - падкрэсліў Аляксандр Кулік.-0-