Снапкоў: Беларусь і Кітай дэманструюць усяму свету ўзорны прыклад супрацоўніцтва

11 ліпеня, Мінск /Кар. БЕЛТА/. Беларусь і Кітай дэманструюць усяму свету ўзорны прыклад супрацоўніцтва. Аб гэтым заявіў першы намеснік прэм'ер-міністра Мікалай Снапкоў на сустрэчы з міністрам камерцыі Кітайскай Народнай Рэспублікі Ван Вэньтаа ў Пекіне, паведамілі карэспандэнту БЕЛТА ў прэс-службе ўрада.

"Новы статус міждзяржаўных адносін - усепагоднага ўсебаковага стратэгічнага партнёрства ў новую эпоху - гэта заканамернае развіццё стратэгічнага супрацоўніцтва Беларусі і Кітая", - падкрэсліў Мікалай Снапкоў.

У мэтах падрыхтоўкі эканамічнага парадку дня маючага адбыцца пасяджэння Беларуска-кітайскага міжурадавага камітэта па супрацоўніцтве бакі абмеркавалі ход рэалізацыі ключавых дамоўленасцей лідараў дзвюх краін, дасягнутых у ходзе дзяржаўнага візіту Прэзідэнта Беларусі Аляксандра Лукашэнкі ў Кітай у сакавіку бягучага года.

Субяседнікі дэталёва абмеркавалі перспектывы развіцця беларуска-кітайскіх гандлёвых адносін. Бакі дамовіліся сканцэнтраваць сумесныя намаганні на стварэнні спрыяльных умоў для нарошчвання ўзаемнага гандлю, развіцці дзеючых і асваенні новых гандлёвых механізмаў, павышэнні эфектыўнасці лагістычных маршрутаў і нарошчвання чыгуначных перавозак, укараненні эфектыўных механізмаў узаемадзеяння па пытаннях паставак у Беларусь важнага абсталявання, сыравіны і матэрыялаў.

Па выніках 2022 года па абароце тавараў краіны дасягнулі рэкорднага аб'ёму $5,8 млрд. Пяць месяцаў бягучага года адзначаны ростам тавараабароту ў 1,5 раза. Рэкорднымі тэмпамі расце экспарт беларускіх тавараў у Кітай: у 2022 годзе - у 1,8 раза, за 5 месяцаў 2023 года - у 1,6 раза.

Таксама Мікалай Снапкоў у рамках падрыхтоўкі да пасяджэння Беларуска-кітайскага міжурадавага камітэта па супрацоўніцтве сустрэўся з міністрам фінансаў Кітайскай Народнай Рэспублікі Лю Кунем. Бакі абмяняліся думкамі аб бягучым стане і перспектывах двухбаковага партнёрства ў крэдытна-інвестыцыйнай сферы ў рамках ініцыятывы "Адзін пояс, адзін шлях", дамовіліся ўмацоўваць фінансавае супрацоўніцтва.-0-