Снапкоў: гандлёвым сеткам трэба развіваць супрацоўніцтва з айчыннымі вытворцамі

17 кастрычніка, Баранавічы /Кар. БЕЛТА/. Першы намеснік прэм'ер-міністра Мікалай Снапкоў правёў у Баранавічах рабочую сустрэчу з прадстаўнікамі вытворцаў і гандлёвых арганізацый па пытанні рэалізацыі задачы па павелічэнні долі продажаў айчынных тавараў у гандлі, перадае карэспандэнт БЕЛТА.

Перад пачаткам сустрэчы першы віцэ-прэм'ер азнаёміўся з экспазіцыяй тавараў беларускай вытворчасці, дзе быў прапанаваны шырокі асартымент тавараў айчынных вытворцаў. Сярод іх былі кандытарскія вырабы, трыкатаж, малочная і многія іншыя віды прадукцыі. У размове з журналістамі першы віцэ-прэм'ер даў станоўчую характарыстыку прадукцыі айчынных вытворцаў, у тым ліку баранавіцкіх. Разам з тым, Мікалай Снапкоў выказаў меркаванне, што гэту прадукцыю трэба больш актыўна прасоўваць на ўнутраным рынку.

"Думаю, гэта не апошняя такая сустрэча. Мы збяромся яшчэ некалькі разоў, каб прыняць ужо канчатковае рашэнне. Спадзяюся, што яно будзе эфектыўным і доўгатэрміновым", - звярнуўся да ўдзельнікаў сустрэчы Мікалай Снапкоў.

Першы віцэ-прэм'ер заявіў аб неабходнасці больш цеснага супрацоўніцтва айчынных вытворцаў і гандлёвых сетак. "На гэты момант мы можам канстатаваць, што дружбы паміж імі няма. Ёсць супрацоўніцтва, часам вымушанае. Таму мы павінны здружыць сеткі і айчынных вытворцаў. Зразумела, што і да вытворцаў ёсць пытанні. Іх трэба трэніраваць вырабляць прадукцыю, вывучаць попыт рынку, каб яны разумелі, што трэба рынку. Значыць, сеткам, якія больш актыўныя ў прасоўванні тавараў, трэба дапамагаць вытворцам, каб яны рабілі прадукцыю ў тым выглядзе і колькасці, што патрэбна рынку", - канстатаваў Мікалай Снапкоў.

Ён заслухаў выступленні айчынных вытворцаў і прадстаўнікоў гандлёвых сетак. Размова ішла аб сітуацыі з продажамі айчынных і імпартных тавараў лёгкай прамысловасці на ўнутраным рынку, стварэнні раўназначных умоў па прадстаўленні гандлёвымі сеткамі тавараў імпартнай і айчыннай вытворчасці па плошчы выкладкі такіх тавараў на гандлёвым абсталяванні. Акрамя таго, прадстаўнік арганізацыі гандлю закрануў пытанні недастатковасці мер, што прымаюцца айчыннымі вытворцамі па пашырэнні ўласных тавараў.