Тавараабарот паміж Беларуссю і Расіяй вырас за студзень-верасень на 11 працэнтаў

10 лістапада, Брэст /Кар. БЕЛТА/. Тавараабарот паміж Беларуссю і Расіяй вырас за студзень-верасень на 11 працэнтаў. Аб гэтым на сумесным пасяджэнні калегій Міністэрства эканомікі Беларусі і Міністэрства эканамічнага развіцця Расійскай Федэрацыі паведаміў міністр эканамічнага развіцця РФ Максім Рашэтнікаў, перадае карэспандэнт БЕЛТА.

"У мінулым годзе ўзаемны тавараабарот паміж Беларуссю і Расіяй вырас на 14 працэнтаў - гэта быў гістарычны максімум. І, мяркуючы па лічбах дзевяці месяцаў, у нас абарот павялічыўся яшчэ на 11 працэнтаў. Мы ў бягучым годзе яго перасягнём. Гэта сведчыць аб тым, што тэндэнцыі развіваюцца", - сказаў Максім Рашэтнікаў.

Пры гэтым рост у гандлі падмацоўваецца дынамікай інвестыцыйнага супрацоўніцтва. Так, за першае паўгоддзе расійскія інвестыцыі ў беларускую эканоміку выраслі на трэць да мінулага года. Інвестыцыйная актыўнасць дае магчымасць развіваць кааперацыйныя праекты. Адзін з такіх, у прыватнасці, рэалізуецца ў Брэсце - вытворчасць кухоннай бытавой тэхнікі ў кампаніі "Гефест".

Запусціць новыя інвестпраекты дапамагае крэдыт больш як на 100 млрд расійскіх рублёў, якія Беларусь атрымала ў мінулым годзе. Ужо адобраны 20 праектаў на 74 млрд рублёў. Больш за 2,5 млрд бізнес ужо атрымаў. На гэтыя сродкі пашыраецца вытворчасць камплектуючых камбайнаў, ідзе мадэрнізацыя Мінскага падшыпнікавага завода, вытворчасць самазвалаў, будаўнічай тэхнікі. "Для Беларусі гэта гарантаваныя рабочыя месцы, а для Расіі - рэгулярныя пастаўкі той самай прадукцыі, якая цяпер нам неабходна для выпуску канечнай прадукцыі", - адзначыў міністр эканамразвіцця РФ.

У Брэсце сёння праходзіць сумесная калегія Мінэканомікі Беларусі і Мінэканамразвіцця РФ. Беларускую дэлегацыю ўзначальвае міністр эканомікі Аляксандр Чарвякоў. У пасяджэнні прымаюць удзел старшыня Брэсцкага аблвыканкама Юрый Шулейка, міністр спорту і турызму Беларусі Сяргей Кавальчук і дзяржаўны сакратар Саюзнай дзяржавы Дзмітрый Мезенцаў.