ЦТ па замежнай мове на 100 балаў напісалі 140 абітурыентаў

5 ліпеня, Мінск /Кар. БЕЛТА/. Цэнтралізаванае тэсціраванне па замежнай мове на 100 балаў напісалі 140 абітурыентаў. Аб гэтым карэспандэнту БЕЛТА паведаміў дырэктар Рэспубліканскага інстытута кантролю ведаў Юрый Міксюк.

"Сталі вядомы вынікі цэнтралізаванага тэсціравання па замежнай мове. На 100 балаў іспыт напісалі 140 абітурыентаў, 117 з іх па англійскай мове, 12 - па нямецкай, 8 - па французскай, 1 - па іспанскай, а таксама ўпершыню 2 - па кітайскай мове", - расказаў Юрый Міксюк.

Вынікі ЦТ можна атрымаць на сайце Рэспубліканскага інстытута кантролю ведаў. Сертыфікат удзельнік атрымае ў пункце, у якім ён праходзіў ЦТ, пры прад'яўленні дакумента, што засведчвае асобу, з якім абітурыент праходзіў тэсціраванне, а таксама дакумента аб адукацыі і пропуску з адзнакай "Тэсціраванне прайшоў". Пропуск пры гэтым будзе забраны.

Асноўны этап цэнтралізаванага тэсціравання завершаны. Па 6 ліпеня ідзе рэгістрацыя для праходжання ЦТ у рэзервовыя дні.