У Беларусі да канца 2030 года ўстановяць 85 суперхуткіх зарадных комплексаў для электракараў

2 чэрвеня, Мінск /Кар. БЕЛТА/. У Беларусі да канца 2030 года будуць устаноўлены 85 суперхуткіх зарадных комплексаў для электрамабіляў. Аб гэтым паведаміў намеснік генеральнага дырэктара па будаўніцтве і агульных пытаннях РУП "Вытворчае аб'яднанне "Беларуснафта" Андрэй Коцік на брыфінгу "Электрамабілі: сусветныя трэнды і тэндэнцыі развіцця ўнутранага рынку" ў прэс-цэнтры БЕЛТА.

"Да 2025 года суперхуткія комплексы з'явяцца ва ўсіх абласных гарадах і на трасе М1. Да канца 2030 года па ўсёй краіне будуць устаноўлены 85 суперхуткіх зарадных комплексаў. Агульная магутнасць - 600 МВт", - сказаў Андрэй Коцік.

Паводле яго слоў, літаральна два тыдні таму зарадная інфраструктура Беларусі была прызнана лідарам на міжнародным экалагічным конкурсе "Зялёная Еўразія" сярод краін ЕАЭС. "Праектам, які найбольш вылучаўся, стаў наш суперхуткі зарадны комплекс. Менавіта на ім мы рэалізавалі ўсе сучасныя трэнды ў тэхналогіі электрамабіляў. Гэта і сістэма збірання электрычнай энергіі, і пантограф для рэйсавага электробуса, таксама ёсць магчымасць электракару зарадзіцца за 10 хвілін на 300 км", - расказаў намеснік гендырэктара.