У Мінск з усёй краіны дастаўляюць дзясяткі тон гуманітарнага грузу для дзяцей з Данбаса

18 студзеня, Мінск /Кар. Дзясяткі тон гуманітарнага грузу ўдалося сабраць у рамках дабрачыннай акцыі РГА "Белая Русь" па аказанні дапамогі Данбасу, паведамілі БЕЛТА ў грамадскім аб'яднанні.

Там таксама нагадалі, што акцыя "Белая Русь" - дзецям Данбаса" стартавала ў пачатку снежня мінулага года. Ужо цяпер на складах у сталіцы знаходзяцца 12 т гуманітарнай дапамогі з Мінска і некалькіх раёнаў Мінскай вобласці. У бліжэйшыя дні прыбудзе гуманітарная дапамога і з іншых рэгіёнаў.

На наступным тыдні прадукты харчавання, салодкія падарункі, канцылярскія тавары, лякарствы, медыцынскія вырабы і многае іншае адправяцца ў Данбас да дзяцей. Пакуль валанцёры - курсанты Ваеннай акадэміі і студэнты Беларускага дзяржаўнага эканамічнага ўніверсітэта - сартуюць гуманітарны груз.

У грамадскім аб'яднанні нагадалі, што акцыя рэалізуецца ў цеснай звязцы з прадстаўніцтвам Рассупрацоўніцтва ў Беларусі і з арганізацыяй "Руская гуманітарная місія". Яны ўзялі на сябе дастаўку грузу і размеркаванне яго на месцах. У "Белай Русі" падкрэслілі, што гатоўнасць заўсёды прыйсці на дапамогу сябру ў цяжкую хвіліну - адметная рыса народаў Расіі і Беларусі, важнейшы складнік іх цывілізацыйнага кода, а беражлівае стаўленне да гістарычных традыцый і захаванне сапраўдных маральных арыенціраў - фундамент грамадскай згоды ў абедзвюх краінах.

У РГА "Белая Русь" адзначылі, што акцыю па дапамозе дзецям Данбаса можна назваць вялікім саюзным праектам па аказанні дапамогі пацярпелым рэгіёнам.