Урачыстая цырымонія закрыцця ІІ Гульняў краін СНД прайшла ў "Мінск-Арэне"

13 жніўня, Мінск /Кар. БЕЛТА/. Урачыстая цырымонія закрыцця ІІ Гульняў краін СНД прайшла ў "Мінск-Арэне", перадае карэспандэнт БЕЛТА.

Самая маштабная спартыўная падзея гэтага лета падышла да фіналу. II Гульні краін СНД сабралі ў Беларусі гасцей і ўдзельнікаў з больш як 20 краін. Спаборніцтвы былі адкрытыя, таму ў Беларусь прыехалі спартсмены не толькі з краін Садружнасці, але і Венесуэлы, Пакістана, Ірана, Кубы, ААЭ, Егіпта, Манголіі, Малайзіі, В'етнама, Лівана, Амана і іншых дзяржаў. Што характэрна, II Гульні краін СНД прайшлі не толькі ў сталіцы - спартсмены спаборнічалі на арэнах у дзесяці гарадах Беларусі.

Беларускія спартсмены на Гульнях выступілі больш чым дастойна. Нашы суайчыннікі прынеслі ў скарбонку зборнай больш за 200 медалёў рознай пробы і сталі другімі ў агульным медальным заліку. Мацнейшай аказалася толькі зборная Расіі. Трэцімі сталі спартсмены з Узбекістана.

Цырымонія закрыцця II Гульняў краін СНД праходзіць у "Мінск-Арэне". Арганізатары мерапрыемства падрыхтавалі эфектнае відовішча. Гасцей "Мінск-Арэны" і тых, хто сочыць за цырымоніяй па тэлевізары і ў інтэрнэце, чакае парад атлетаў, насычаная канцэртная праграма і яркія сцэнічныя нумары. На цырымоніі прагучаць новыя вакальныя творы спартыўнай тэматыкі. Акрамя таго, для ўдзельнікаў спаборніцтваў і замежных гасцей прыгатавана танцавальная праграма.-0-