ВНУ Беларусі будуць прымаць без экзаменаў пераможцаў сваіх унутрыўніверсітэцкіх алімпіяд

2 снежня, Мінск /Кар. БЕЛТА/. Беларускія ВНУ будуць прымаць без экзаменаў пераможцаў сваіх унутрыўніверсітэцкіх алімпіяд. Аб гэтым расказала журналістам першы намеснік міністра адукацыі Ірына Старавойтава, перадае карэспандэнт БЕЛТА.

"Універсітэцкія алімпіяды - форма, якая дазваляе праявіць здольнасці адораным дзецям. Яны могуць паспрабаваць свае сілы. Рэзультат універсітэцкай алімпіяды для пераможцаў - паступленне ў вышэйшую навучальную ўстанову таго ўніверсітэта, які аб'яўляе алімпіяду", - расказала Ірына Старавойтава.

Яна нагадала, што пераможцы рэспубліканскіх алімпіяд таксама маюць ільготы пры паступленні ў вышэйшыя навучальныя ўстановы. Пры гэтым такім выпускнікам адкрыты дзверы любых ВНУ. "Што датычыцца ўніверсітэцкай алімпіяды, то пераможцы маюць права быць уключанымі ў спісы студэнтаў толькі гэтай вышэйшай навучальнай установы", - растлумачыла першы намеснік міністра.

Пакуль мяркуецца, што ўніверсітэцкія алімпіяды будуць праводзіцца толькі ў рэгіянальных ВНУ. "Упэўнены, і абмеркаванне гэта паказала, што такую форму трэба пашыраць. У бягучым годзе прапануецца правядзенне ўніверсітэцкіх алімпіяд у рэгіянальных ВНУ (іх пераможцы атрымаюць права на залічэнне без іспытаў. - Заўвага БЕЛТА). Гэта дазволіць замацаваць і пакінуць таленавітую моладзь у рэгіёнах і падрыхтаваць адпаведныя кадры", - адзначыў у сваю чаргу міністр адукацыі Андрэй Іванец.