Хрэнін: Вялікая Перамога аб'ядноўвае мільёны людзей Еўропы і Азіі

9 мая, Мінск /Кар. БЕЛТА/. Вялікая Перамога аб'ядноўвае мільёны людзей Еўропы і Азіі. Аб гэтым міністр абароны Віктар Хрэнін заявіў на цырымоніі ўскладання вянкоў да манумента Перамогі ў Мінску з выпадку 78-й гадавіны Вялікай Перамогі, перадае карэспандэнт БЕЛТА.

Па даручэнні кіраўніка дзяржавы Віктар Хрэнін выказаў пазіцыю людзей у пагонах аб значэнні Вялікай Перамогі і ахарактарызаваў ваенна-палітычную абстаноўку вакол Беларусі.

"Сёння дзень Вялікай Перамогі вялікага савецкага народа. Кожны год мы прыходзім на гэта свяшчэннае месца - да велічнага манумента, увенчанага ордэнам Перамогі. Гэты сімвал гістарычнай памяці ўзвышаецца над горадам-героем Мінскам, нагадваючы пра подзвіг, падобнага да якога не ведае гісторыя чалавецтва. Подзвіг, які сёння аб'ядноўвае мільёны людзей Еўропы і Азіі - усіх, хто захаваў у сабе ген доблесці і мужнасці продкаў", - адзначыў міністр.

Ён падкрэсліў, што беларусы ганарацца кожным сваім воінам - ад простага салдата да генерала, якія разам з братэрскімі народамі вытрымалі ўдар гітлераўскай Германіі, разбілі армію, мабілізаваную з усёй Заходняй Еўропы і ўзброеную да зубоў на грошы сусветных магнатаў.

"Мы ганарымся нашымі партызанамі, падпольшчыкамі і разведчыкамі, якія набліжалі пераможны май у тыле ворага, не баючыся шыбеніц і катаванняў, не шкадуючы свайго жыцця. Мы ганарымся маці, якія праводзілі мужоў і сыноў на фронт, пад страхам смерці выпякалі хлеб для партызан, хавалі яўрэяў і параненых байцоў Чырвонай Арміі, а дзяцей закрывалі сваімі целамі ад куль і бомбаў. Наша сэрца да гэтага часу гарыць агнём Хатыні і соцень беларускіх вёсак, спаленых разам з бездапаможнымі старымі, жанчынамі і дзецьмі. Мы схіляем галовы перад памяццю нашых братоў з усіх куткоў Савецкага Саюза, якія вызвалілі Беларусь і назаўсёды засталіся ляжаць у нашай зямлі", - заявіў Віктар Хрэнін.

У час цырымоніі памяць загінулых і ўсіх сведкаў страшных злачынстваў нацызму, хто не дажыў да Перамогі, ушанавалі мінутай маўчання.-0-