Заяц: экспарт беларускай сельгаспрадукцыі за дзевяць месяцаў склаў каля $5 млрд

31 кастрычніка, Мазырскі раён /Кар. БЕЛТА/. Па выніках работы за дзевяць месяцаў экспарт беларускай сельгаспрадукцыі склаў амаль $5 млрд. Такія даныя агучыў намеснік прэм'ер-міністра Леанід Заяц на адкрыцці абноўленага малочнатаварнага комплексу КСУП "Слабадское імя Леніна" Мазырскага раёна, перадае карэспандэнт БЕЛТА.

"У аграпрамысловы комплекс, у яго развіццё, матэрыяльна-тэхнічную базу ўкладваюцца вялізныя сумы. І ўкладваюцца з такім разлікам, каб і цяперашнія (пакаленні. - Заўвага БЕЛТА), і прыйшоўшыя нам на змену маглі скарыстацца створанай базай і карміць уласны народ, і гандляваць з суседзямі, замежнымі краінамі", - падкрэсліў Леанід Заяц.

Ён зрабіў акцэнт: беларуская дзяржава забяспечвае насельніцтва прадуктамі харчавання ўласнай вытворчасці. "Мы атрымліваем на нашых палях, на нашых фермах менавіта тое, што карыстаецца сёння вялікай папулярнасцю ў спажыўца. Лішкі паспяхова прадаём на замежных рынках. Толькі па выніках работы за дзевяць месяцаў экспарт склаў каля $5 млрд. Мы на 108 працэнтаў у фізічным вылічэнні прадалі прадукцыі больш, чым за дзевяць месяцаў 2022 года", - агучыў вынікі работы намеснік прэм'ер-міністра. Ён выказаў упэўненасць у тым, што гэта не мяжа.

"За гэтымі лічбамі стаіць каласальная работа нашых земляробаў, работнікаў жывёлагадоўчых комплексаў і ферм, механізатараў, органаў дзяржкіравання, спецыялістаў і гэтак далей", - дадаў Леанід Заяц.