Бібліятэкары ў
вобразе беларусачак з прывітаннямі на сакавітай роднай мове сустракалі
старшакласнікаў. Ва ўступным слове яны расказалі аб заснаванні Міжнароднага дня
роднай мовы і менавіта чаму ён адзначаецца 21 лютага, прадэкламавалі вершы
вядомых паэтаў, якія раскрываюць шматграннасць беларускай мовы.
Рабятам была
прапанавана гульня, у ходзе якой яны змаглі ўзбагаціць свае веды пра мову,
прадэманстраваць, што ім ужо вядома. Спаборнічалі дзве каманды, за кожнае правільна выкананае
заданне каманда атрымоўвала кветку васілёк – сімвал Беларусі. Каб сабраць
вялікі букет для нашай мовы ў дзень яе свята, рабяты пачалі турнір з размінкі “Веру
не веру”, потым спаборнічалі ў конкурсах “Перакладчыкі”, “Знаўцы”, “Складзі
фразеалагізмы”, “Расшыфруй прыказку”, “Конкурс паэтаў” і інш. Вельмі напружаным
і цікавым атрымаўся конкурс капітанаў “Эрудыты-мовазнаўцы”, у якім спаборнічалі
найлепшыя знаўцы роднай мовы. Вельмі спадабаліся ўдзельнікам “Загадкі з вясёлай
хаткі”, з якімі яны паспяхова справіліся.
Старшакласнікі
склалі цудоўны букет з васількоў для нашай мілагучнай роднай мовы. Спадзяёмся,
што рабяты даведаліся шмат цікавага і новага на нашай сустрэчы, разам з тым і праверылі
свае веды. А шчырыя, сардэчныя і цёплыя
словы беларускай мовы будуць заўжды гучаць з іх вуснаў і ўпрыгожваць іх жыццё. Напрыканцы
сустрэчы ўсе прысутныя выказалі сваю павагу да роднага слова, разам зачыталі радкі В.Шведа “10 запаведзяў”, склалі эмблему нашай
сустрэчы “Я люблю родную мову!”.