Ветэран ВАВ з Гродна: цаніце Перамогу і беражыце Радзіму
10.05.2024
9 мая, Гродна /Кар. БЕЛТА/. У Гродне ветэраны Вялікай Айчыннай вайны ў час урачыстых мерапрыемстваў з нагоды Дня Перамогі падзяліліся сваімі эмоцыямі і далі наказ моладзі, перадае карэспандэнт БЕЛТА."Мы сёння адзначаем 79 гадоў Перамогі, а маё пакаленне вызваліла Радзіму і заваявала гэту Перамогу. Столькі гадоў мінула, як на зямлі ўсталяваўся мір. За гэта мы абавязаны нашаму пакаленню, якое аддало 27 млн жыццяў за Перамогу. Жывіце доўга. Мы вас абаранілі для таго, каб вы неслі Сцяг Перамогі далей. А вы добра, смела несяце, - сказала ветэран Вялікай Айчыннай вайны Валянціна Баранава. - Я не прымаю ўсе плашчы, якія мне прапануюць, таму што мяне сагравае сённяшні дзень. 79-годдзе Перамогі - гэта гарачы дзень. Жывіце доўга, родныя мае, здароўя вам і шчасця!"
Даў наказ моладзі і ветэран Вялікай Айчыннай вайны Мікалай Лагуткін. "Жывіце і штодзень памятайце аб Перамозе, цаніце тое, што для вас зрабілі вашы продкі. І самае галоўнае - беражыце Радзіму", - падкрэсліў ён.
"Мне вельмі прыемна, што я дажыў яшчэ да аднаго вялікага свята. Я лічу, што гэта менавіта наша свята! Мы змагаліся супраць фашызму, наша армія, нашы савецкія, беларускія людзі. Мне прыемна, што я жыву і магу аб гэтым гаварыць", - дадаў Мікалай Лагуткін.-0-
Фота Леаніда Шчаглова
