1 снежня, Мінск /Кар. БЕЛТА/. НАН Беларусі і Судан будуць развіваць навукова-тэхнічнае супрацоўніцтва, у першую чаргу ў галіне сельскагаспадарчай вытворчасці, жывёлагадоўлі і перапрацоўкі карысных выкапняў. Такая дамоўленасць дасягнута ў ходзе перагавораў старшыні Прэзідыума НАН Беларусі Уладзіміра Гусакова з Надзвычайным і Паўнамоцным Паслом Судана ў Беларусі Махамедам Амерам Мусой Алі, паведамілі БЕЛТА ў прэс-службе НАН.
Як адзначыў у ходзе сустрэчы Уладзімір Гусакоў, НАН Беларусі надае асаблівае значэнне развіццю ўзаемавыгаднага супрацоўніцтва з Суданам. "У нас вялікая цікавасць да работы з вашай краінай. НАН Беларусі гатова да супрацоўніцтва па ўсіх перспектыўных напрамках у залежнасці ад вашых інтарэсаў. Мы ведаем, што Судан - сельскагаспадарчая краіна. Беларускія вучоныя гатовы прапанаваць сваю дапамогу ў адаптацыі насення беларускай селекцыі да ўмоў афрыканскага клімату, а таксама нашу сельгастэхніку для сяўбы, уборкі і апрацоўкі ўраджаю. Ваша краіна багатая на прыродныя рэсурсы. Навуковыя арганізацыі НАН Беларусі гатовы паставіць у Судан спецыяльныя ўстаноўкі для перапрацоўкі карысных выкапняў, у тым ліку руд, якія змяшчаюць каштоўныя элементы", - адзначыў ён.
Старшыня Прэзідыума НАН прапанаваў суданскаму боку дапамогу ў галіне жывёлагадоўлі, а таксама ў арганізацыі ў Судане навуковай структуры па тыпу НАН Беларусі для навуковага суправаджэння галін эканомікі гэтай афрыканскай краіны.
У сваю чаргу пасол Судана адзначыў, што суданскі бок адкрыты для супрацоўніцтва з вучонымі Акадэміі навук. "Судан можа стаць для Беларусі варотамі ў Афрыку. Я бачу, як развіта ваша краіна, на якім высокім узроўні ў вас навука і тэхналогіі. Лічу, што сёння неабходна развіваць супрацоўніцтва паміж нашымі краінамі і гэта супрацоўніцтва будзе карыснае ў розных сферах", - падкрэсліў Махамед Амер Муса Алі.
Па выніках перагавораў беларускі і суданскі бок прыйшлі да думкі, што ў бліжэйшы час неабходна сфарміраваць дэлегацыі і абмяняцца візітамі вучоных Беларусі і Судана, а таксама падрыхтаваць мемарандум аб навукова-тэхнічным супрацоўніцтве.
Таксама ў ходзе перагавораў былі абмеркаваны перспектывы развіцця навукова-тэхнічнага супрацоўніцтва паміж арганізацыямі НАН Беларусі і арганізацыямі Судана. Госці падрабязна азнаёміліся з апошнімі распрацоўкамі вучоных, якія прадстаўлены на пастаянна дзеючай выстаўцы "Дасягненні айчыннай навукі - вытворчасці".