3 мая, Мінск /Кар. БЕЛТА/. Беларуская тэнісістка Вікторыя Азаранка і бразільянка Беатрыс Хадад Мая прабіліся ў паўфінал парнага разраду турніру катэгорыі WTA-1000 у Мадрыдзе з прызавым фондам $7,6 млн, паведамляе карэспандэнт БЕЛТА.
Сёння ў чвэрцьфінальным матчы беларуска-бразільскі тандэм абыграў у двух сэтах іспанку Паўлу Бадосу і амерыканку Бэтані Матэк-Сандс - 7:6 (7:0), 7:5.
Да гэтага Вікторыя Азаранка і Беатрыс Хадад Мая прайшлі амерыкана-нідэрландскі дуэт Дэзірэ Краўчык / Дэмі Схюрс - 6:2, 3:6, 10:7 і амерыкана-расійскую пару Кэці Макнэлі / Ганна Калінская.
Заўтра ў паўфінале адзіночнага разраду другая ракетка планеты беларуска Арына Сабаленка сустрэнецца з грэчаскай тэнісісткай Марыяй Сакары, якая займае 9-е месца ў сусветным рэйтынгу. На шляху да паўфінальнага паядынку лепшая беларуская тэнісістка абыграла румынку Сарану Кырсцю (44-ы нумар рэйтынгу WTA) - 6:4, 6:3, калумбійку Камілу Асорыа (115) - 6:4, 7:5, расіянку Міру Андрэеву (194) - 6:3, 6:1 і егіпцянку Маяр Шэрыф (59) - 2:6, 6:2, 6:1. У 2021 годзе Арына Сабаленка выйграла мадрыдскі турнір.
Цяперашнія спаборніцтвы на адкрытых грунтавых кортах іспанскай сталіцы завершацца 7 мая.