12 ліпеня, Віцебск /Кар. БЕЛТА/. Дзіцячы конкурс, тэатральныя сустрэчы, першы вялікі канцэрт у Летнім амфітэатры і сольнік Сяргея Лазарава пройдуць сёння на "Славянскім базары ў Віцебску". Аб гэтым карэспандэнту БЕЛТА паведамілі ў дырэкцыі міжнароднага форуму мастацтваў.
Нягледзячы на тое, што афіцыйна фестываль адкрыецца ў чацвер, ужо сёння ў міжнародным прэс-цэнтры пройдзе адразу некалькі сустрэч з зоркамі і арганізатарамі.
У 11.00 тэмай для дыялогу стане V Міжнародны танцавальны праект Dream Dance Fest, жараб'ёўка і канцэрт якога прайшлі напярэдадні.
У 12.30 журналісты і ўдзельнікі форуму змогуць задаць пытанні салістам групы "АЎРА" Юліі Быкавай і Яўгену Алейніку.
У 13.00 у абноўленай да фестывалю канцэртнай зале "Віцебск" адкрыецца выстава фатографа Дар'і Ерамеевай "Прастора крэатыву", у 13.30 там жа маскоўскі дабрачынны фонд "Місія" прадставіць экспанаты, створаныя рукамі выхаванцаў дзіцячых дамоў, на інтэрактыўнай выставе "Падарожжа матрошкі".
У 14.00 КЗ "Віцебск" напоўніцца музыкай і дзіцячым вакалам - тут стартуе конкурсная частка XXI Міжнароднага дзіцячага музычнага конкурсу "Віцебск". Юныя таленты ўпершыню ў гэтым шоу выступяць у суправаджэнні Нацыянальнага акадэмічнага канцэртнага аркестра Беларусі імя М.Я.Фінберга.
У 15.00 у прэс-цэнтры будуць гаварыць пра тэатральнае мастацтва. Трупа Маскоўскага музычна-драматычнага тэатра "РАМЭН" раскажа пра спектакль "Мы - цыганы", які ідзе з аншлагам ужо больш за 40 гадоў. Гэту пастаноўку калектыў прывёз і на віцебскае васільковае свята. Сустрэча з гледачом назначана на 19.00.
У 15.30 у Мастацкім музеі адкрыецца выстава "Спатканне з Бразіліяй", арганізаваная пасольствам гэтай рэспублікі ў нашай краіне.
У 16.00 у абласным музеі Героя Савецкага Саюза М.П.Шмырова ўрачыста адкрыецца праект агенцтва Sputnik Беларусь "Саўінфармбюро: 1943 год. Пачатак вызвалення".
У 18.30 чараду вялікіх канцэртаў у Летнім амфітэатры адкрые шоу "Мір вашаму дому" адказнай за беларускі кантэнт на фестывалі групы "АЎРА". Праект поўнасцю адпавядае канцэпцыі форуму і прысвечаны Году міру і стварэння. Гасцямі дуэта стануць Анатоль Ярмоленка, Алёна Ланская, Руслан Аляхно, група DoReDoS, Аляксандр Саладуха, Ангеліна Волкава, Аляксандр Елаўскіх і іншыя артысты.
У 22.00 завершыць праграму фестывальнага дня сольны канцэрт Сяргея Лазарава пад адкрытым небам. Свае хіты расійскі артыст выканае на пляцоўцы перад канцэртнай залай "Віцебск".