Як прагаласаваць у адзіны дзень галасавання па месцы пражывання, расказала сакратар ЦВК
25.01.2024
24 студзеня, Мінск /Кар. БЕЛТА/. Сакратар Цэнтральнай выбарчай камісіі Беларусі Алена Балдоўская расказала карэспандэнту БЕЛТА, як грамадзяне Беларусі могуць прагаласаваць у адзіны дзень галасавання па месцы пражывання.
"Выканкамы і мясцовыя адміністрацыі забяспечваюць улік выбаршчыкаў на аснове даных рэгістра насельніцтва і іншых інфармацыйных сістэм і перадаюць спісы ўчастковым выбарчым камісіям. Камісіі праводзяць работу па ўдакладненні спісаў. З 9 лютага кожнаму выбаршчыку ў памяшканні ўчастковай камісіі забяспечваецца магчымасць праверыць, ці ўключаны ён у спіс і ці правільна ў спісе пазначаны звесткі аб ім", - сказала Алена Балдоўская.
Паводле слоў сакратара ЦВК, удакладнены спіс выбаршчыкаў падпісваецца старшынёй і сакратаром участковай камісіі. Выбаршчыкі атрымліваюць бюлетэні на аснове спіса, прад’яўляючы члену ўчастковай камісіі пашпарт, ідэнтыфікацыйную картку, студэнцкі білет, вадзіцельскае пасведчанне або іншы дакумент з пераліку, які можна знайсці на сайце.
"Калі чалавек, напрыклад, зарэгістраваны ў Гродне, але пражывае ў Мінску, і ў яго ёсць афіцыйна заключаны дагавор найму жылога памяшкання, ён можа прыйсці з гэтым дагаворам ва ўчастковую камісію па месцы свайго пражывання. Гэта дасць магчымасць уключыцца ў спіс і прагаласаваць па месцы пражывання. Але гэта трэба зрабіць да асноўнага дня галасавання, гэта значыць не пазней за 24 лютага", - падкрэсліла Алена Балдоўская.
