7 лютага, Мінск /Кар. БЕЛТА/. Старшыня праўлення Нацыянальнага банка Павел Калаур на нарадзе ў кіраўніка дзяржавы па законапраекце "Аб змяненні законаў па пытаннях банкаўскай дзейнасці" далажыў аб плануемых змяненнях у Банкаўскі кодэкс, перадае карэспандэнт БЕЛТА.
"Актуалізацыя Банкаўскага кодэкса праведзена для ўдасканалення прававога поля, у якім працуе Нацыянальны банк і банкі. Неабходнасць яго карэкціроўкі абумоўлена змяненнямі макраэканамічнага асяроддзя і агульнадзяржаўнага заканадаўства, інтэграцыйнымі працэсамі ў фінансавай сферы, а таксама дынамічным развіццём інфармацыйных тэхналогій у банкаўскім сектары", - растлумачыў Павел Калаур.
Сярод прапанаваных змяненняў асобна можна вылучыць блок заканадаўчых ініцыятыў макраэканамічнага характару.
Першае. Пашырэнне мэт, іншымі словамі, арыенціраў у дзейнасці Нацыянальнага банка.
"Прапануецца ў дадатак да мэты "падтрыманне цэнавай стабільнасці" замацаваць другую мэту - "забеспячэнне фінансавай стабільнасці", а таксама норму па садзейнічанні ўстойліваму эканамічнаму развіццю краіны", - расказаў кіраўнік Нацбанка.
З прававога пункту гледжання гэта дасць магчымасць упарадкаваць адказнасць і правамоцтвы на забеспячэнне фінансавай стабільнасці, а таксама ўдакладніць ключавыя напрамкі дзейнасці Нацыянальнага банка, падкрэсліў Павел Калаур. "Эканамічны эфект: узрасце накіраванасць грашова-крэдытнай палітыкі на фарміраванне спрыяльнага асяроддзя для ўстойлівага развіцця эканомікі", - заявіў ён.
Другое. Удасканаленне правага механізма забеспячэння фінансавай стабільнасці.
"Гэтай нормай вызначаюцца статус Нацыянальнага банка як дзяржаўнага органа, адказнага за забеспячэнне фінансавай стабільнасці ў банкаўскай і іншых рэгулюемых ім сферах, а таксама комплексныя падыходы да забеспячэння фінансавай стабільнасці. Гэта палажэнне накіравана на павышэнне патэнцыялу па выпрацоўцы і прыняцці папераджальных мер, па нейтралізацыі магчымых выклікаў і шокаў, узмацненне міжведамаснага ўзаемадзеяння, а таксама пашырэнне магчымасці па комплексным і эфектыўным процідзеянні сістэме рызык", - далажылі кіраўніку дзяржавы.
У Нацыянальным банку ўпэўнены, што ў цэлым рэалізацыя прапанаваных норм дасць магчымасць павысіць эфектыўнасць грашова-крэдытнай палітыкі, а таксама яе ўзгодненасць з агульнаэканамічнай палітыкай. Акрамя таго, гэта будзе садзейнічаць выкананню абавязацельстваў беларускага боку па саюзнай праграме па арганізацыі грашова-крэдытнай палітыкі і макрапрудэнцыйнага рэгулявання.
Пасля нарады Павел Калаур расказаў журналістам, што работа па актуалізацыі Банкаўскага кодэкса не была пачата спантанна, яна прадаўжаецца апошнія паўтара-два гады. Да яе былі далучаны ўрад, Камітэт дзяржаўнага кантролю, абедзве палаты парламента, эксперты, банкаўская супольнасць.
"Гэта актуалізацыя - яна ад жыцця. Яна наспела, таму што мяняюцца тэхналогіі, у банкаўскай сістэме ў тым ліку, узмацняецца напрамак па абароне правоў спажыўцоў фінансавых паслуг. І, безумоўна, прынята новая Канстытуцыя - трэба прыводзіць у адпаведнасць", - адзначыў кіраўнік Нацыянальнага банка.
Асобныя нормы, дадаў ён, накіраваны на гарманізацыю заканадаўства з заканадаўствам Расіі. "У першую чаргу размова ідзе аб новай мэце, якая пасля прыняцця Банкаўскага кодэкса будзе замацавана, - мэта па забеспячэнні фінансавай стабільнасці. Цяпер ёсць норма, што Нацыянальны банк разам з урадам забяспечвае маніторынг. Але маніторынг - гэтага недастаткова, трэба яшчэ мець адпаведныя інструменты, - растлумачыў Павел Калаур. - У нас у частцы Нацыянальнага банка сем праграм. Усе яны накіраваны на тое, каб забяспечыць грамадзянам, прадпрыемствам умовы для работы ў спрыяльным рэжыме з расійскімі прадпрыемствамі і грамадзянамі. Усё гэта ў інтарэсах непасрэдных удзельнікаў інтэграцыйнага працэсу".
Кіраўнік дзяржавы па выніках нарады ў цэлым адобрыў прапанаваныя навацыі. Разам з тым ён даручыў дапрацаваць асобныя палажэнні, "дашліфаваць" дакумент і ўнесці яго на разгляд у парламент.
"Я думаю, што мы ў аператыўным парадку зможам гэту работу выканаць і накіраваць дакумент у Палату прадстаўнікоў", - дадаў Павел Калаур.