12 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка 12 красавіка падпісаў указ нумар 102 "Аб развіцці Парка высокіх тэхналогій", падрыхтаваны па выніках праведзенай напярэдадні нарады аб развіцці ІТ-галіны ў краіне. Аб гэтым БЕЛТА паведамілі ў прэс-службе беларускага лідара.
Дакумент накіраваны на стварэнне ўмоў для далейшага перспектыўнага развіцця ПВТ з апорай на сучасныя тэхналагічныя тэндэнцыі і фактычна адкрывае новую старонку ў гісторыі ІТ-галіны Беларусі.
Указам прадугледжана з'яўленне ў структуры Парка высокіх тэхналогій кіруючай кампаніі, якая зоймецца інтэнсіўным стратэгічным развіццём ПВТ. Кіруючая кампанія будзе прадстаўляць ПВТ пры ўзаемадзеянні з замежнымі партнёрамі, аказваць рэзідэнтам парка садзейнічанне ў пашырэнні экспарту, выхадзе на новыя рынкі і прыцягненні замежных інвестыцый.
Пры гэтым усе ўмовы дзейнасці ў парку - прававыя, падатковыя, фінансавыя - захоўваюцца на ранейшым узроўні без якіх-небудзь змяненняў.
У поўным аб'ёме захоўваюцца і паўнамоцтвы Наглядальнага савета ПВТ, для забеспячэння дзейнасці якога будзе сфарміраваны сакратарыят.