27 мая, Мінск /Кар. БЕЛТА/. СМІ неабходна кансалідавана адстойваць пазіцыю дзяржавы, заявіў журналістам намеснік кіраўніка Адміністрацыі Прэзідэнта Ігар Луцкі. Ён прымае ўдзел у I Форуме медыйнай супольнасці Беларусі "СМІ ў эпоху лічбавізацыі", перадае карэспандэнт БЕЛТА.
"Учора адбылася сустрэча Прэзідэнта з парламентарыямі, іншымі дзяржаўнымі людзьмі, экспертнай супольнасцю. І прагучала адна такая вельмі важная фраза ад кіраўніка дзяржавы: пранікнуцца сітуацыяй сённяшняга дня. На мой погляд, гэта быў зварот да нас, журналістаў, медыйнай супольнасці. Таму што на самай справе вельмі шмат залежыць ад таго, як аператыўна, дакладна мы раскажам нашым людзям аб тым, што адбываецца. Я ўжо не гавару аб тым, што адбываецца па-за тэрыторыяй Рэспублікі Беларусь, якую інфармацыйную атаку на нас ажыццявілі. Але сёння трэба вельмі тонка, дакладна растлумачыць падзеі ў свеце і краіне. Прэзідэнт учора адзначыў работу сродкаў масавай інфармацыі. І я лічу, што нам нельга ні на секунду расслабляцца", - сказаў Ігар Луцкі.
Паводле яго слоў, сённяшні фармат новы. "Мы прывыклі традыцыйна праводзіць выстаўку. Але журналіст моцны словам, моцны пяром. І настаў час пагаварыць аб тым, што адбываецца ў медыйным полі краіны. Аб тым, як нам сумеснымі намаганнямі не толькі тут у Мінску, але і ў рэгіёнах (а тут вельмі шмат прадстаўнікоў рэгіёнаў) кансалідавана адстойваць пазіцыю дзяржавы, пазіцыю краіны, пазіцыю суверэнітэту. Ён непахісны. Яго нельга ставіць пад сумненне. Вы бачыце, што адбываецца. Падзеі, якія ў Латвіі адбыліся, далі нейкі пэўны штуршок, я нават сказаў бы, кансалідацыі грамадства вакол дзяржаўнай сімволікі. Дзяржаўная сімволіка - гэта атрыбуты дзяржавы, гэта частка дзяржавы. І я заклікаў бы ўсіх, можа быць, да нейкай акцыі, флэш-мобу, выказаць сваё меркаванне, сваю пазіцыю ў адносінах да нашай сімволікі. Гэта вельмі важна сёння - з'яднацца ўсім і быць адзінымі", - адзначыў намеснік кіраўніка Адміністрацыі Прэзідэнта.
Ігар Луцкі таксама зачытаў прывітанне Прэзідэнта ўдзельнікам, гасцям і арганізатарам форуму.
Для ўдзелу ў форуме запрошаны больш за 200 прадстаўнікоў рэспубліканскіх і рэгіянальных сродкаў масавай інфармацыі, медыяэксперты, удзельнікі школы маладых журналістаў. На пленарным пасяджэнні і тэматычных дыскусіях плануецца абмеркаваць найбольш актуальныя пытанні развіцця айчынных медыя, ролю і месца дзяржаўных СМІ ў інфармацыйнай бяспецы краіны, прэзентаваць перадавыя практыкі работы беларускіх і расійскіх рэдакцый ва ўмовах лічбавізацыі.-0-