2 сакавіка, Мінск /Кар. БЕЛТА/. Памятны мітынг у сувязі з гадавінай масавага знішчэння вязняў Мінскага гета адбыўся ў Мінску каля мемарыяла "Яма", перадае карэспандэнт БЕЛТА.
Традыцыйна кветкі да манумента, дзе 2 сакавіка 1942 года былі расстраляны нацыстамі каля 5 тыс. вязняў Мінскага гета, усклалі прадстаўнікі дыпламатычных місій замежных краін, грамадскіх, рэлігійных арганізацый, члены яўрэйскай абшчыны Мінска.
"Лічбы халакосту жудасныя - 150 тыс. яўрэяў з Беларусі і Еўропы, прывезеных сюды, былі знішчаны ў Мінскім гета, 800 тыс. яўрэяў Беларусі былі знішчаны ў час халакосту, 6 млн - ва ўсім свеце, - адзначыў старшыня саюза беларускіх яўрэйскіх грамадскіх аб'яднанняў і абшчын Алег Рагатнікоў. - Мы прыходзім сюды кожны год, каб успомніць людзей, якія тут ляжаць, пра іх трагедыі. Мы прыходзім дзеля таго, каб не забыць і не дараваць тых жудасных падзей. Мы прыходзім дзеля будучых пакаленняў. Таму што пакуль мы кожны год прыходзім сюды і прыносім кветкі, успамінаем гэтых людзей, наша памяць жыва, і мы не дапусцім, каб тыя жудасныя падзеі паўтарыліся калі-небудзь".
Часовы павераны ў справах Дзяржавы Ізраіль у Рэспубліцы Беларусь Цві Міркін адзначыў, што яму як ізраільскаму дыпламату часта даводзіцца ўдзельнічаць у памятных мерапрыемствах, прысвечаных халакосту. "Адно з апасенняў, якое ўзнікае на гэты момант, - што гэта ператворыцца проста ў звыкласць. Але калі прыходзіш у месцы тыпу "Ямы", разумееш, што гэтыя апасенні беспадстаўныя і кожны раз нібыта занава адчуваеш гэту трагедыю", - сказаў Цві Міркін. Ён выказаў надзею, што памяць пра людзей, якія сталі ахвярамі халакосту, захаваецца ў манументах, архіўных дакументах і, вядома, у памяці многіх пакаленняў.