15 мая, Мінск /Кар. БЕЛТА/. Намеснік прэм'ер-міністра Беларусі Ігар Петрышэнка абазначыў перспектывы двухбаковага ўзаемадзеяння ў час пасяджэння міжурадавай беларуска-азербайджанскай камісіі па гандлёва-эканамічным супрацоўніцтве ў Баку, паведамляе карэспандэнт БЕЛТА.
"Адносіны паміж Беларуссю і Азербайджанам, заснаваныя на моцнай дружбе паміж лідарамі нашых краін і двума брацкімі народамі, маюць характар стратэгічнага партнёрства. Заканамерна, што складаная сусветная палітычная кан'юнктура не аказала ніякага негатыўнага ўплыву на нашы адносіны. Наадварот, мы заўсёды падтрымлівалі адзін аднаго ў складаныя часы, і гэта традыцыя захоўваецца. Узаемавыгаднае эканамічнае супрацоўніцтва з'яўляецца флагманам далейшага развіцця адносін паміж Беларуссю і Азербайджанам", - сказаў Ігар Петрышэнка.
Беларусь значна павялічыла экспарт у Азербайджан трансфарматараў, кабеляў і іншай электратэхнічнай прадукцыі, прадукцыі дрэваапрацоўкі, а таксама прадуктаў харчавання. У сваю чаргу Азербайджан наладзіў надзейны канал пастаўкі ў Беларусь агародніны і фруктаў, якія замянілі імпарт з недружалюбных краін, адзначыў віцэ-прэм'ер.
Акрамя прамога гандлю таварамі, усё большае значэнне ў пашырэнні сувязей у эканамічнай сферы займае рэалізацыя ўзаемавыгадных сумесных кааперацыйных праектаў. "Супрацоўніцтва беларускіх машынабудаўнікоў з Гянджынскім аўтамабільным заводам стала знакавым праектам для нашых краін, паказаўшы выдатны прыклад эфектыўнага ўзаемадзеяння ў сферы вытворчай кааперацыі. За 17 гадоў сумеснай работы на базе завода сабрана больш за 12 тыс. беларускіх трактароў, а таксама каля 4 тыс. адзінак іншай тэхнікі (МАЗ, МЗКЦ, "Амкадор"). Беларускі бок настроены на прадаўжэнне сумеснай работы па пашырэнні спектра сумесна выпускаемай тэхнікі, уключаючы збожжаўборачныя камбайны і сучасную, адпаведную высокім экалагічным стандартам пасажырскую тэхніку (электробусы)", - падкрэсліў Ігар Петрышэнка.
Віцэ-прэм'ер бачыць перспектывы ў арганізацыі паставак у Азербайджан і іншай беларускай тэхнікі: будаўнічай, камунальнай, чыгуначнай, аварыйна-выратавальнай і розных відаў спецыяльнай тэхнікі. Беларускі бок зацікаўлены ў нарошчванні паставак у Азербайджан ліфтаў, а таксама стварэнні іх зборачнай вытворчасці пад адпаведныя аб'ёмы спажывання.
"Акрамя таго, бачым значны патэнцыял у сумеснай рэалізацыі праграм развіцця сельскагаспадарчай галіны Азербайджана, у тым ліку жывёлагадоўлі. Гатовы ўкараніць наш багаты перадавы вопыт стварэння жывёлагадоўчых комплексаў, а таксама забяспечыць патрэбнасці ў племянной жывёле, неабходных тэхналогіях і абсталяванні, высокапрадукцыйных, збалансаваных камбікармах і прэміксах. Высокую актуальнасць мае праект па стварэнні сумеснай вытворчасці ветэрынарных прэпаратаў на тэрыторыі Азербайджана", - звярнуў увагу Ігар Петрышэнка.
"Наша плённае супрацоўніцтва не абмяжоўваецца толькі ўзаемным гандлем. Прыемна адзначыць, што за апошнія гады значна актывізавалася ўзаемадзеянне ў сферах аховы здароўя, навукі, адукацыі, спорту і турызму паміж нашымі краінамі. Мы ўдзячныя за давер да нашай адукацыі і медыцыны і гатовы прыняць большую колькасць азербайджанскіх грамадзян, якія хочуць вучыцца, лячыцца ці проста падарожнічаць у нашай краіне", - канстатаваў віцэ-прэм'ер.