18 красавіка, Мінск /Кар. БЕЛТА/. У сучасных умовах вельмі важна развіваць нацыянальную сістэму забеспячэння кібербяспекі. Аб гэтым заявіў дзяржаўны сакратар Савета бяспекі Аляксандр Вальфовіч у ходзе ўрачыстай цырымоніі адкрыцця ХХІХ Міжнароднага форуму па інфармацыйна-камунікацыйных тэхналогіях ТІБО-2023, перадае карэспандэнт БЕЛТА.
"Лічбавізацыя выводзіць эканоміку на якасна новы ўзровень і становіцца адной з умоў поспеху ў складанай канкурэнтнай барацьбе на сусветных рынках. Узмацняецца ўплыў перадавых тэхналогій і на жыццё грамадзян, асабліва ў будаўніцтве, адукацыі, ахове здароўя, забеспячэнні ўсіх сфер нацыянальнай бяспекі. Важным з'яўляецца акцэнт цяперашняй выстаўкі на ўкараненні рашэнняў, якія павышаюць даступнасць тэхналогій разумнага горада. Аднак сучасны лічбавы сектар зведвае санкцыйны націск, выкліканы ўзрастаючым узроўнем канфрантацыі і саперніцтва паміж вядучымі сусветнымі дзяржавамі. Гэта фарміруе шэраг выклікаў як для дзяржаўнага сектара, так і для прыватных кампаній. Фіксуюцца настойлівыя спробы асобных дзяржаў выкарыстоўваць сетку Інтэрнэт для мэтанакіраванага дэструктыўнага ўздзеяння на беларускае грамадства, аб'екты інфармацыйнай інфраструктуры нашай краіны. Кіберзлачынцамі прымяняюцца найноўшыя дасягненні ў галіне лічбавых тэхналогій", - сказаў Аляксандр Вальфовіч.
У сувязі з гэтым як ніколі актуальным з'яўляецца развіццё нацыянальнай сістэмы забеспячэння кібербяспекі. "Нам неабходна акумуляваць існуючыя дасягненні, навуковы патэнцыял у інтарэсах абароны лічбавага суверэнітэту Беларусі", - падкрэсліў дзяржсакратар Савета бяспекі.
Аляксандр Вальфовіч лічыць, што дасягнуць гэтага магчыма толькі дзякуючы зладжанай сумеснай рабоце дзяржавы, бізнесу і грамадскіх інстытутаў на нацыянальным і міжнародным узроўнях.
Міжнародны форум па інфармацыйна-камунікацыйных тэхналогіях ТІБО-2023 прадоўжыцца па 21 красавіка. На выстаўцы прадукцыю і паслугі прадстаўляюць вядомыя вытворцы тэлекамунікацыйнага абсталявання, апаратных сродкаў і праграмнага забеспячэння, аператары мабільнай і фіксаванай сувязі, распрацоўшчыкі і пастаўшчыкі высокатэхналагічных прадуктаў, сістэм бяспекі, інтэлектуальных рашэнняў і сэрвісаў для масавага і карпаратыўнага сегмента, навуковыя і адукацыйныя ўстановы. На пляцоўцы "Мінск-Арэны" пройдуць ІІІ Форум "Лічбавая эканоміка", V Еўразійскі лічбавы форум і VI Беларускі ІКТ-саміт. Пройдуць і спадарожныя мерапрыемствы - Інтэрнэт-прэмія ТІБО, рэспубліканскі конкурс стартап-праектаў Belarus ICT Startup Award, нацыянальны адборачны этап VI Міжнароднай Scratch-алімпіяды па крэатыўным праграмаванні сярод школьнікаў, Мінскі адкрыты турнір па адукацыйнай робататэхніцы, Рэспубліканскі чэмпіянат па кіберспорце.