1 чэрвеня, Мінск /Кар. БЕЛТА/. Бягучая сусветная абстаноўка знаходзіцца пад уплывам сістэмнага крызісу міжнародных адносін. Аб гэтым на 52-м пасяджэнні Савета кіраўнікоў органаў бяспекі і спецслужбаў СНД заявіў дзяржаўны сакратар Савета бяспекі Беларусі Аляксандр Вальфовіч, перадае карэспандэнт БЕЛТА.
Аляксандр Вальфовіч выказаў словы ўдзячнасці за магчымасць прыняць удзел у прадстаўнічым пасяджэнні і данёс пункт гледжання Беларусі па праблемах, аб якіх будзе ісці размова. "52-е пасяджэнне Савета кіраўнікоў органаў бяспекі і спецслужбаў дзяржаў - удзельніц СНД праходзіць ва ўмовах беспрэцэдэнтнага абвастрэння геапалітычнай абстаноўкі. Калектыўны Захад, напляваўшы на нормы міжнароднага права і элементарную прыстойнасць, забыўшы аб правілах добрасуседства, усімі сіламі імкнуцца ўбіць клін у нашу Садружнасць. У цэнтры гэтай падрыўной дзейнасці знаходзяцца спецслужбы замежных дзяржаў і падкантрольная ім сетка ўсялякіх няўрадавых арганізацый са шматмільённымі бюджэтамі", - заявіў Аляксандр Вальфовіч.
Дзяржсакратар Савета бяспекі спыніўся на найбольш значных аспектах міжнароднай і рэгіянальнай бяспекі ў кантэксце інтарэсаў не толькі Беларусі, але і ўсіх краін СНД. "Даводзіцца канстатаваць, што бягучая абстаноўка ў свеце знаходзіцца пад уплывам сістэмнага крызісу міжнародных адносін. Чалавецтва ўступіла ў эпоху вострага глабальнага процістаяння. Яно распаўсюджваецца не толькі на ваенных, але і на іншыя вымярэнні, уключаючы гандлёва-эканамічныя сувязі, кіберпрастору і іншыя напрамкі", - канстатаваў ён.
Як адзначыў Аляксандр Вальфовіч, у ліку асноўных пагроз не толькі мілітарызацыя еўрапейскага і азіяцкага рэгіёнаў, але і стагнацыя механізмаў нераспаўсюджвання зброі масавага знішчэння. "Адзначаецца і ўзмацненне тэхналагічнага саперніцтва ў стратэгічна важных сферах, такіх як выкарыстанне штучнага інтэлекту ў ваенных мэтах. Цяперашнюю абстаноўку ў еўрапейскім рэгіёне, у эпіцэнтры якой знаходзіцца Беларусь, магчыма ацаніць як буйнейшы ваенна-палітычны крызіс з часоў заканчэння Другой сусветнай вайны", - лічыць Аляксандр Вальфовіч.