29 чэрвеня, Мінск /Кар. БЕЛТА/. Ваша праца бачная і важная для дзяржавы, адзначыў прэм'ер-міністр Раман Галоўчанка, уручаючы 29 чэрвеня дзяржаўныя ўзнагароды прадстаўнікам розных працоўных калектываў, перадае карэспандэнт БЕЛТА.
Урачыстая цырымонія адбылася ў Палацы Рэспублікі. Тут сабраліся лепшыя прадстаўнікі самых розных прафесій з розных куткоў Беларусі.
"Эмоцыі зашкальваюць, хвалююся", - сказала вядучы інжынер ААТ "Рудзенск" Данута Кулеш, якая амаль 53 гады адпрацавала на родным прадпрыемстве. Падобнымі эмоцыямі дзеліцца і начальнік упраўлення па адукацыі Полацкага раённага выканаўчага камітэта Ірына Драздова: "Адчуваю гонар, радасць, вельмі моцнае пачуццё адказнасці".
І такімі эмоцыямі дзяліліся сёння ўсе, хто прыехаў у Палац Рэспублікі на ўрачыстае ўручэнне дзяржаўных узнагарод. Мерапрыемства, як адзначылі прадстаўнікі самых розных прафесій, сапраўды вельмі важнае і значнае.
Усім прысутным на ўрачыстай цырымоніі Раман Галоўчанка адрасаваў словы падзякі за працу і адданасць сваёй справе. "Ваша праца бачная і важная для дзяржавы", - адзначыў кіраўнік урада.
Ён падкрэсліў, што па даручэнні Прэзідэнта Беларусі Аляксандра Лукашэнкі дзяржаўныя ўзнагароды ўручаюцца прафесіяналам, чые заслугі і ўклад у развіццё роднай краіны па праву адзначаны дзяржавай.
Раман Галоўчанка таксама звярнуў увагу, што цырымонія праходзіць напярэдадні важнейшага для краіны свята - Дня Незалежнасці Рэспублікі Беларусь. "Гэта свята сімвалізуе свабоду, сілу і адзінства нашай краіны. Яно таксама служыць напамінам аб тым, як слабаабаронены мір, як складана здабываецца незалежнасць і як важна яе берагчы. Магчымасць жыць у суверэннай дзяржаве, самастойна вызначаць курс знешняй і ўнутранай палітыкі зыходзячы з уласных інтарэсаў - выключная каштоўнасць і важнейшае дасягненне беларускага народа", - сказаў Раман Галоўчанка.
Адрасуючы словы падзякі за плённую работу прадстаўнікам самых розных прафесій, якія сабраліся на цырымоніі ўзнагароджвання, прэм'ер-міністр абазначыў асаблівую ролю тых, хто аддана служыць сваёй Айчыне. "Кожны з прысутных у гэтай зале сваёй штодзённай працай уносіць важкі ўклад ва ўмацаванне нашай незалежнасці. З такіх маленькіх, але вельмі каштоўных "цаглінак" складаецца і фарміруецца стабільная, сучасная, суверэнная Беларусь, якая ўпэўнена глядзіць у будучыню", - адзначыў ён.
Асобныя словы падзякі прагучалі ў адрас тых, хто працуе цяпер у сістэме адукацыі, працуе над навуковымі праектамі. "Мы гаворым дзякуй работнікам сферы адукацыі і навукі. Ад вашай працы залежыць інтэлектуальнае развіццё нашага грамадства, фарміраванне самага каштоўнага, напэўна, чалавечага капіталу, які з'яўляецца галоўным фактарам пабудовы інавацыйнай эканомікі і эканомікі ведаў. Менавіта такія задачы ставіць цяпер перад сабой наша краіна. У сувязі з гэтым мы чакаем ад беларускіх вучоных вялікай аддачы ў выкананні даследаванняў у запатрабаваных галінах нашай эканомікі", - падкрэсліў кіраўнік урада.
Аднак асабліва шмат сёння ў зале, як адзначыў прэм'ер-міністр, работнікаў сферы прамысловасці. "І гэта нездарма: галіна працуе стабільна, прырастаючы ў аб'ёмах вытворчасці ўжо не першы год. За мінулы перыяд года аб'ём вытворчасці прамысловай прадукцыі ў краіне - большы за 112 працэнтаў, тэмпы росту экспарту - 123 працэнты, што ў гэтых умовах з'яўляецца вельмі нядрэнным рэзультатам", - абазначыў сітуацыю ў галіне Раман Галоўчанка.
Словы падзякі прагучалі таксама ў адрас супрацоўнікаў фінансавых і падатковых службаў, будаўнікоў, работнікаў транспартнай і нафтахімічнай галін, прадстаўнікоў творчай інтэлігенцыі.
Сярод узнагароджаных - і кіраўнікі розных узроўняў. Паводле слоў Рамана Галоўчанкі, гэта менавіта тыя людзі, на якіх ускладзена адказнасць за эфектыўную работу ўзначаленых арганізацый і працоўных калектываў і якія паспяхова спраўляюцца на даручаным участку работы.
"Няпросты час патрабуе ад кожнага з вас максімальнай мабілізацыі, засяроджанасці, дысцыпліны і самааддачы. Будзьце прыкладам для сваіх падначаленых, няхай ваша ўпэўненасць і кампетэнтнасць матывуе іх на дасягненне прафесійных вышынь пад вашым кіраўніцтвам", - менавіта з такім пасылам звярнуўся да кіраўнікоў прэм'ер-міністр.
Сярод узнагароджаных - дырэктар Самахвалавіцкай сярэдняй школы Валянціна Смаленская. Прэм'ер-міністр уручыў ёй медаль "За працоўныя заслугі".
"Сённяшняя ўзнагарода сапраўды заслуга майго вялікага калектыву - Самахвалавіцкай сярэдняй школы Мінскага раёна, у якой я працую 35 гадоў дырэктарам. Мне вельмі прыемна сказаць, што 50 працэнтаў педагогаў - былыя выпускнікі нашай школы. У нашай школе вельмі камфортна, тут шануюць традыцыі і любяць дзяцей. Таму мне вельмі прыемна, што частку падзякі я прывязу ў свой родны самахвалавіцкі калектыў", - падкрэсліла Валянціна Смаленская.
Як расказала начальнік упраўлення па адукацыі Полацкага райвыканкама Ірына Драздова, удастоеная медаля "За працоўныя заслугі", у прафесіі яна ўжо 36 гадоў. "Работа педагога, настаўніка - гэта ўсё маё жыццё, - адзначыла яна. - Я ўдзячна сваім калегам. Толькі ў адзінай камандзе, сумесна можна дасягнуць выніку. Вядома, важна любоў да той справы, якую робіш. І асабліва адказна і значна тое, што ўзнагароды нам уручылі напярэдадні Дня Незалежнасці. Мяне перапаўняе пачуццё гонару за нашу краіну, за нашы магчымасці і пачуццё ўдзячнасці за тое, што нас заўважаюць і нашу працу адзначаюць дзяржаўнымі ўзнагародамі. Гэта выклікае жаданне яшчэ лепш працаваць", - адзначыла Ірына Драздова.
Мантажнік ААТ "Будаўнічы трэст нумар 4" Аляксандр Пацкевіч пра свае заслугі гаворыць сціпла. "Вядома, вельмі прыемна, што праца адзначана на такім высокім узроўні", - сказаў ён, дадаўшы, што нічога спецыяльна для атрымання ўзнагароды не рабіў, "проста вось ужо 41 год на адным месцы добрасумленна выконваў сваю работу, дапамагаў моладзі".
"Я з вялікай удзячнасцю успрыняла навіну, што мой працоўны калектыў, старшыня Вярхоўнага Суда мяне прадставілі да гэтай высокай узнагароды", - расказала начальнік галоўнага ўпраўлення арганізацыйнага і метадычнага забеспячэння судовай дзейнасці Вярхоўнага Суда Ларыса Мацвяенкава, удастоеная Падзякі Прэзідэнта за шматгадовую плённую працу, высокі прафесіяналізм, значны асабісты ўклад у развіццё і ўмацаванне судовай сістэмы, забеспячэнне законнасці. "Вельмі ўдзячна за давер і высокую ацэнку маёй работы. З 35 гадоў стажу 25 - у сістэме судоў. Лічу, што кожны на сваім месцы павінен сумленна працаваць", - падкрэсліла Ларыса Мацвяенкава.
Вядучы інжынер ААТ "Рудзенск" Данута Кулеш ад прэм'ер-міністра атрымала медаль "За працоўныя заслугі". Сваіх эмоцый вядучы інжынер не хавае, ад урачыстасці моманту нават праслязілася. "Мне здаецца, каб атрымаць такую ўзнагароду, трэба проста добрасумленна працаваць. Я адпрацавала на прадпрыемстве амаль 53 гады. Са студэнцкай парты, маладзенькай студэнткай прыйшла і вось да гэтага часу разам з калектывам прафесійна расту. А ўзнагарода не толькі мая - гэта ўзнагарода ўсяго нашага калектыву", - дадала Данута Кулеш.