Электраспажыванне ў Беларусі ў студзені-верасні вырасла амаль на 2 млрд кВтгадз

26 кастрычніка, Мінск /Кар. БЕЛТА/. Аб'ём электраспажывання ў Беларусі за дзевяць месяцаў 2021 года павялічыўся на 1,95 млрд кВтгадз у параўнанні з аналагічным перыядам мінулага года і склаў 29,5 млрд кВтгадз. Аб гэтым сказаў міністр энергетыкі Віктар Каранкевіч на сустрэчы з працоўным калектывам Гродзенскай ЦЭЦ-2, паведамілі БЕЛТА у прэс-службе Мінэнерга. Пры гэтым спажыванне электраэнергіі рэальным сектарам эканомікі за гэты перыяд вырасла на 1,12 млрд кВтгадз, насельніцтвам – на 200 млн кВтгадз, энергасістэмай – на 630 млн кВтгадз. Як паведаміў Віктар Каранкевіч, у мінулым годзе аб'ём электраспажывання ў краіне склаў 38 млрд кВтгадз. У гэтым годзе прагназуецца, што ён перавысіць 40 млрд кВтгадз, а да канца 2025 года вырасце да 44 млрд кВтгадз. "На працягу 2021 года назіраецца ўстойлівая дынаміка росту электраспажывання", - сказаў Віктар Каранкевіч. Паводле яго слоў, гэтаму садзейнічалі комплексныя меры, прынятыя на ўзроўні кіраўніка дзяржавы і ўрада. У прыватнасці, рэалізуецца міжгаліновы комплекс мер па павелічэнні спажывання электраэнергіі да 2025 года, у рамках якога ствараюцца новыя і мадэрнізуюцца дзеючыя вытворчасці. Растуць аб'ёмы электрыфікацыі жыллёвага фонду. Гэта работа арганізавана па трох асноўных напрамках - электрыфікацыя шматкватэрнага жылога фонду, перавод шматкватэрных дамоў з выкарыстання цвёрдага паліва на электраэнергію, а таксама электрыфікацыя індывідуальнага жылфонду для патрэб ацяплення і гарачага водазабеспячэння. Колькасць зваротаў у энергазабеспячальныя арганізацыі аб выдачы тэхнічных умоў на далучэнне электраўстановак аднакватэрных жылых дамоў да электрычных сетак у краіне па-ранейшаму павялічваецца. Гэтаму садзейнічаюць стымулюючыя тарыфы для насельніцтва, зацверджаныя на ўзроўні кіраўніка дзяржавы, а таксама магчымасць кампенсавання часткі расходаў на электразабеспячэнне. За студзень - верасень 2021 года ў энергазабеспячальныя арганізацыі паступіла 20,4 тыс. такіх зваротаў, з іх 16,7 тыс., або 82 працэнты, былі задаволены. Усяго з 2019 года па мінулы перыяд 2021 года паступіла 49 тыс. зваротаў, з іх задаволена 39,2 тыс. Звароты, якія не былі задаволены, уключаны ў перспектыўныя планы рэканструкцыі электрасетак, зацверджаныя энергазабеспячальнымі арганізацыямі па ўзгадненні з аблвыканкамамі і Мінскім гарвыканкамам. "Выкарыстанне электраэнергіі для мэт ацяплення і гарачага водазабеспячэння стварае дадатковыя камфортныя ўмовы пражывання для нашых грамадзян, у першую чаргу ў сельскіх населеных пунктах", - падкрэсліў міністр. Усяго ў краіне больш за 23 тыс. сельскіх населеных пунктаў, з іх газіфікаваны каля 3,5 тыс. У той жа час доступ да электраэнергіі ёсць ва ўсіх населеных пунктах. "Там, дзе ёсць тэхнічныя ўмовы, трэба даваць людзям магчымасць выкарыстоўваць электраэнергію для патрэб ацяплення і гарачага водазабеспячэння", - сказаў ён. Для пашырэння гэтых магчымасцей прадоўжыцца мадэрнізацыя электрасеткавай інфраструктуры. Стаіць задача павялічыць аб'ём будаўніцтва і мадэрнізацыі ліній электраперадачы з 1,6 тыс. км да 2,7 тыс. км у год.